DILI, 15 Setembru 2025 (TATOLI)—Diresaun Jerál Servisu Rejistu Notariadu iha Ministériu Justisa (MJ) no Diresaun Nasionál Empregu Estranjeiru iha Sekretaria Estadu Formasaun Profisionál no Empregu (SEFOPE) sei koordena malu hodi diskute kona-ba kritériu ba aplikante sira ba rekrutamentu serbisu iha rai-li’ur.
Diretór Jerál Servisu Rejistu Notariadu, Agostinho Gonçalves Viera hateten, inisiativa ne’e atu evita joven sira labele forma naruk iha Notaridu, liuliu ba atendimentu ba emisaun dokumentu.
“Atu evita ida-ne’e, ami koordena ho sira SEFOPE, liuliu diresaun ida-ne’ebé mak trata ba asuntu Serbisu Esterna nian, hodi diskute kona-ba kritériu ne’ebé sira fó sai, karik bele ba oin ne’e kritériu sira hanesan Pasaporte no Billhete Identidade (BI) inklui Rejistu Kriminál ne’e bele anexa bainhira kandidatu ne’e nia liu ona iha vaga ne’e,” Diretór Jerál informa ba Ajénsia TATOLI, iha ninia knaar fatin, Segunda ne’e.
Nia nota, joven barak halo pedidu emisaun ba Pasaporte, BI no Sertidaun Rejistu Kriminál bainhira vaga rekrutamentu serbisu iha Nova Zelándia loke, maibé barak liu mak pedidu ba Rejistu Kriminál.
Notísia relevante : SEFOPE hahú anúnsiu vaga online ba joven sira servisu iha Nova Zelandia
Diretór Jerál dehan, labele hanesan situsaun ida foin daudaun ne’e akontese iha Notariadu tanba vaga rekrutamentu serbisu iha Nova Zelándia durante loron-lima (08-12 Setembru), maibé kokorrente sira ne’ebé kokorre vaga ne’e barak liu tiha vaga ne’ebé Governu Nova Zelándia hakarak, ezemplu ema hakarak timoroan na’in-100 maibé konkorente barak liu.
“Tanba ne’e, ita presiza haree hodi koordenasaun ho SEFOPE para karik konkorrente ne’ebé liu vaga ne’e mak ninia Pasaporte, BI no Rejitu Kriminál ita bele hatama ikus iha sira-nia dokumentu. Sé lae mak ne’e, joven sira mai barak barak to’o ita emite tiha Pasaporte, BI no Rejistu Kriminál ba sira, maibé sira la halo buat ida. Ida-ne’e mak presiza haree hodi evita ema labele forma naruk iha ne’e,” nia katak.
Jornalista : Natalino Costa
Editora : Julia Chatarina
