DILI, 15 Setembru 2025 (TATOLI) – Iha abertura lejislativa datoluk iha lejislatura daneen, bankada parlamentár sira destaka hametin unidade nasionál no kooperasaun entre órgaun soberania sira no diálogu entre forsa polítika oioin hodi haree ba dezafiu sira ne’ebé país hasoru.
Xefe Bankada CNRT, Duarte Nunes, koloka dezafiu ne’ebé nasaun hasoru hanesan ki’ak ne’ebé sei afeta nafatin parte importante husi família sira no dezempregu ba foinsa’e sira, ne’ebé ameasa ba esperansa jerasaun foun no dezigualdade sosiál no rejionál, ne’ebé presiza polítika inkluzaun no dezenvolvimentu ne’ebé ekilibradu.
Nia dehan presiza haforsa jestaun responsavel ba rekursu sira husi Fundu Petrolífeiru, hodi asegura katak ida-ne’e mós bele serve jerasaun sira ohin loron no sira iha futuru.
“Dezafiu sira ezije ita atu ba diálogu konstrutivu no kooperasaun nasionál. Bolu unidade, CNRT komprende katak polítika tenke sai hanesan instrumentu servisu públiku, la’ós divizaun”, nia hato’o.
Tanba ne’e, husu atu hametin espíritu unidade nasionál, kooperasaun entre órgaun soberanu hotu no diálogu demokrátiku entre forsa polítika oioin.
“Ami mós apela ba espíritu nasionalizmu husi komponente hotu-hotu atu asegura no mantein estabilidade nasionál ne’ebé konsege metin hamutuk to’o ohin loron”, nia afirma.
Deputadu Partidu Demokrátiku, Mariano Xavier Malik, dehan diálogu no konsentrasaun polítika ba kestaun ne’ebé país hasoru iha dezenvolvimentu nasionál.
Vise-bankada FRETILIN, David Dias Ximenes ‘Mandati’, espera ho sesaun foun la’ós serimónia de’it, maibé momentu luta foun ne’ebé prodús lei ne’ebé justu, polítika konkreta no atitude ne’ebé metin ba dezafiu boot sira hanesan kombate ki’ak no dezempregu, investimentu iha edukasaun no saúde públika, jestaun responsavel no transparente ba rekursu naturál.
Jornalista: Nelson de Sousa
Editora: Maria Auxiliadora
