DILI, 15 Setembru 2025 (TATOLI)—Vaga online Empregadór Seasonal Rekoñesidu (RSE) Nova Zelándia sei la fó impaktu ba aplikante ne’ebé naran tama ona iha sistema Pacific Autrália Labour Mobility (PALM) Autrália.
Notísia Relevante: SEFOPE hahú anúnsiu vaga online ba joven sira servisu iha Nova Zelandia
Sekretária Estadu Formasaun Profisionál no Empregu liuhusi Departamentu Reintegrasaun Estranjeiru, Alarico Fernandes, hateten vaga servisu ne’e fó oportunidade ba ema hotu tanba benefisiáriu sira mós iha interrese atu aplika ba vaga online RSE nian entaun tenke aplika liuhusi karta interresante submete ba aplikasaun e-mail ne’ebé mensiona, maske ninia naran iha sistema RSE no sistema PALM Austrália nian mós iha hotu.
“Ne’e ba aplikante sira-ne’ebé seidauk hetan númeru referénsia iha sistema PALM nian, signifika sira bele buka tan oportunidade seluk mak RSE nian,” Xefe Departamentu ne’e informa ba Agência Tatoli liuhusi telefónika, ohin.
Bainhira aplikante ida, nia naran mak mosu hotu iha sistema rua ne’e sei la fó impaktu tanba depende ba nia mak hakarak hili atu ba servisu iha ida-ne’ebé no sira-nia naran iha sistema nafatin no naran ne’e sei la hamoos (hapus) ida.
Enkuantu nia hatutan prosesu daudaun ne’e ekipa téknika sira sei halo avaliasaun no verifikasaun ba dokumentus sira ne’ebé aplikante sira submete, tuir mai maka sira sei halo scanning dokumentus hotu foin anúnsia fali konkorente ne’ebé pasa ona iha rejistu online RSE nian iha fulan ida ne’e hodi tuir fali teste tuir mai.
“Maibé kona-ba aplikante hira mak aplika ona ne’e ami seidauk hatene númeru lolos tanba sei halo hela verifikasaun dokumentu, karik finaliza ona foin hatene loloos númeru konkorente sira,” nia dehan.
Jornalista : Alexandra da Costa
Editór : Cancio Ximenes
