DILI, 15 Setembru 2025 (TATOLI)—Primeiru-Ministru (PM), Kay Rala Xanana Gusmão, segunda ne’ e, hala‘o vizita bá Londres hodi partisipa iha enkontru estratéjiku ho Konselleiru Superiór no ekipa jurídika kona-bá kestaun Fronteira Terrestre no Marítima.
Iha fulan-Agostu, Timor-Leste sai uma-na’in bá negosiasaun formál da-huluk ho Indonézia kona-bá Fronteira Marítima iha Dili.
Tuir ajenda, Primeiru-Ministru sei hala’o vizita durante semana ida hahú hosi loron 15 to’o 21 fulan Setembru 2025.
Bainhira iha Londres, Primeiru-Ministru mós sei aprezenta hodi Prezidente Repúblika nia naran, Kolár Órden Timor-Leste nian bá Professór Sir Elihu Lauterpacht (póstumu) no Profesór Alan Vaughan Lowe.
Sira na’in-rua hanesan Konselleiru Superiór no Professór Direitu Internasionál; no Medalla Órden Timor-Leste bá Janet Legrand OBE KC (Hon), eis Parseiru iha DLA Piper, nu’udár rekoñesementu bá sira-nia kontribuisaun valioza bá estabelesimentu Fronteira Marítima permanente ho Austrália iha tinan 2018.
Iha vizita ne’e mós Primeiru-Ministru sei hala’o enkontru ho komunidade timoroan sira-ne’ebé hela iha Reinu Unidu.
Primeiru-Ministru, Kay Rala Xanana Gusmão, sei to’o hikas iha Díli iha Segunda (22 Setembru 2025) semana oin.
TATOLI
