KOVALIMA, 16 Setembru 2025 (TATOLI)—Diretór Universidade da Paz (UNPAZ) Ramu Kovalima, Silvester Ferreira Godinho Moniz otimista katak Munisípiu Kovalima bele realiza eleisaun Kamara munisipál, maibé presiza rekezitu balun.
“Ita prontu atu hala’o eleisaun munisipál maibé haree ba rekursu umanu presiza atu eskolla didi’ak, labele haree ba grupu no kór partidu, maibé haree ba futuru Kovalima, tanba bainhira ila dentifika rekursu ho didiak sei la lori mudansa ba Kovalima,” Akademista hato’o ba Jornalista sira, iha nia knaar fatin, Tersa ne’e.
Ho nune’e, atu implementa lei podér lokál no dezentralizasaun administrativa iha Kovalima bele fó serbisu boot ba Kovalima-oan nune’e intelektuál, Igreja, veteranu no Governu lokál bele fiar.
Akádemiku ne’e dehan tan, Kovalima iha rekursu umanu naton, tanba ne’e importante mak identifika inteletuál sira labele haree ba grupu no kór partidu.
“Ha’u hakarak informa katak Kovalima la’ós laiha rekursu umanu, iha rekursu ne’ebé mak naton, maibé problema mak la hatene atu identifika malu tanba haree ba kór partidu polítiku ne’ebé diferénsa,” nia akresenta.
Notísia relevante : CNE fasilita edukasaun sívika kona-ba eleisaun munisipál ba alunu sira iha Kovalima
Partidu polítiku (ParPol) hanesan instrumentu demokrátiku atu implementa polítika tuir nia tempu, bainhira tempu ukun presiza fihir sé mak merese atu ukun atu lori dezenvolvimentu ba rai ida-ne’e nune’e Kovalima-oan tenke fuan boot halo preparasaun atu implementa dezentralizasaun administrativa no podér lokál iha munisípiu Kovalima.
“Intelektuál sira maka sai ibun oinsá atu kontinua transmite informasaun ba inan aman sira, ne’ebé maka la asesu informasaun kualidade nafatin konvida ita hotu atu hola parte iha prosesu dezenvolvimentu Timor-Leste, espesiál iha Kovalima nune’e Kovalima-oan labele sai atan ba munisípiu seluk,” nia fó hanoin.
Iha sorin seluk, Reprezentante Autoridade Kovalima, Afonso Nugueira Nahak husu atu Kovalima-oan atu hamutuk nune’e bele lori dezenvolvimentu Kovalima ba oin.
“Kovalima-oan presiza duni hamutuk atu lori Kovalima tanba ita-nia lema hamutuk hanoin harii futuru Kovalima,ita labele ko’alia iha ibun de’it labele tau intrese partidu, maibé joven mak sei konkretiza la’os ko’alia de’it ”nia dehan.
Fó hanoin fali katak ,Dadaun ne’e Governu sentrál fó ona kompeténsia ba Autoridade munisípiu Kovalima iha pilár tolu maka hanesan,pilár administrasaun,finansa no pilár patrimónu lojistika ,maibé seidauk fó kompeténsia kona-bá polítika.
Bazeia ba Dekretu-Lei númeru 84/2023 no Diploma Ministeriál númeru 85/2023, munisípiu Kovalima kompleta ona nia estrutura munisipál maka hanesan Sekretáriu munisipál no diretór servisu munisipál sira mak sai hanesan tékniku.
Jornalista : Celestina Teles
Editora : Julia Chatarina
