DILI, 16 Setembru 2025 (TATOLI)-Deputadu husi Partidu Kongresu Nasionál Rekonstrusaun Timorense (CNRT, sigla portugés), Saul Salvador, apela ba Estudante Universitáriu Timor-Leste (EUTL) atu hala’o manifestasaun ho dame, la uza violénsia.
Membru Parlamentu Nasionál ne’e dehan ezersísiu direitu fundamentál sidadaun partikulár ba direitu liberdade espresaun, reuniaun no manifestasaun iha Konstituisaun artigu 42 garante direitu sira ne’e. No ai-riin sira Estadu nian ida ne’ebé demokrátiku no bazeia ba lei.
Tanba ne’e nia husu atu halo asaun protesta mak hanesan hahalok lejítimu ida no espresaun sívika no ezersísiu sidadaun ativu nian.
“Maibé, importante atu subliña katak asaun sira hanesan ne’e tenke halo ho dame, la uza violénsia ka hahalok ne’ebé bele kompromete orden públika, no ita-nia nasaun nia seguransa”, nia hato’o iha intervensaun iha reuniaun plenária Parlamentu, ohin.
Hodi husu ba sosiedade sivíl no estudante universitáriu sira ne’ebé nu’udar ajente prinsipál ba konxiénsia no kontrolu sosiál atu asume papél ne’e ho maturidade no responsabilidade. “Estadu garante imi-nia direitu no liberdade, maibé ezije mós atu direitu sira ne’e tenke ezerse ho respeitu ba dignidade umana, patrimóniu koletivu no trankuilidade sosiál”, nia apela.
Tuir nia, hahalok destruisaun, intimidasaun karik kore ho violénsia nunka konsidera hanesan direitu ida. “Violénsia halakon konfiansa, estraga seguransa no atraza dezenvolvimentu”, nia salienta.
Iha sorin seluk, deputada FRETILIN, Nurima Ribeiro Alkatiri, louva estudante no joven idaidak ne’ebé partisipa iha aktu sidadania ida-ne’e no atitude ne’ebé hatudu maturidade polítika, konxiénsia sosiál, liuliu domin ba nasaun.
Tuir nia, iha demokrásia, povu nia lian no liuliu joven sira-nia lian fundamentál tebes. Sosiedade ida buras de’it bainhira nia permite no respeita direitu ba protestu pasífiku, bainhira nia valoriza diálogu nakloke no bainhira nia komprende katak krítika konstrutiva la’ós ameasa ida.
“Foinsa’e hakarak sai protagonista ida-ne’e maka esénsia husi sidadania ativa no juventude ne’ebé konxiente. Timor-Leste presiza imi-nia enerjia, brani, no vizaun krítika atu ita bele harii futuru ida ne’ebé justu liu, inkluzivu, no demokrátiku duni”, nia louva.
Deputada husi opozisaun ne’e konsidera manifestasaun ne’e prova katak, iha demokrasia, vontade maioria nian labele sai boot liu preokupasaun lejítima sira ne’ebé sosiedade sente no espresa.
Notísia relevante: PNTL aprosima EUTL, halo manifestasaun tenke tuir regra no prevene konflitu
Jornalista: Nelson de Sousa
Editora: Maria Auxiliadora
