DILI, 16 Setembru 2025 (TATOLI)-Ministru Planeamentu no Investimentu Estratéjiku, Gastão Sousa, hateten prosesu avaliasaun ba projetu reabilitasaun estrada iha Glenu ba Letefoho-Ermera finaliza ona iha faze aprovizionamentu maibé sei hein resposta husi Banku Mundiál antes implementa.
Notísia Relevante: Banku Mundiál fó empréstimu millaun $59 ba konstrusaun estrada Glenu-Letefoho-Hatubuiliku
“Prosesu aprovizionantu ba estrada Glenu no Letefoho nee hotu ona, agora ami haruka fali karta ida ba Banku Mundial,” Governante ne’e informa ba jornalista sira iha aeroportu Nicolau Lobato, Komoro, ohin.
Governante ne’e esplika karta ne’ebé sira haruka ba Banku Mundial tanba sira husu klarifikasaun antes halo konkordánsia hodi asina kontratu.
“Entaun konteúdu husi karta ne’ebé haruka ba nee husu mantein dezisaun Governu nian tanba lansamentu ba projetu nee la’ós iha tinan oin, tanba buat hotu loos ona no sei implementa husi kompañia internasionál Xineza nian,” nia hateten.
Nune’e, karta ne’ebé mak iha parte Governu liuhusi Ministériu Planeamentu no Investimentu Estratéjiku haruka ona ba, maibé seidauk iha resposta husi banku Mundial.
“Espera sira bele reaposta lalais nune’e ita bele lansa ona projetu reabilitasaun ba estrada iha Ermera ne’e,” nia dehan.
Antes ne’e, Ministru Planeamentu no Investimentu Estratéjiku, Gastão de Sousa, hateten orsamentu ne’ebé tinan ne’e prevee ba KAFI hamutuk millaun $310,75 no ba fundu impréstimu hamutuk millaun $50,29.
“Tinan ne’e mós ita aprova ona projetu konstrusaun estrada husi Gleno bá Letefoho husi fundu empréstimu hamutuk millaun $40-resin,” nia dehan.
Jornalista : Alexandra da Costa
Editór : Cancio Ximenes
