DILI, 17 Setembru 2025 (TATOLI)—Estudante Universitáriu Timor-Leste (EUTL) husu ba Parlamentu Nasionál liuhusi reprezentante bankada parlamentár lima CNRT, FRETILIN, PD, PLP no KHUNTO atu kumpre akordu, hodi diskute Lei Pensaun Vitalísia, iha reuniaun plenária.
Portavos EUTL, Cristovão Mauto hateten, bankada parlamentár sira tenke kumpre saida mak sira konkorda ona atu halakon pensaun vitalísia.
“Ba oin ita haree ba ita-nia akordu ne’ebé iha, akordu ne’ebé ohin Deputadu sira asina no públika ona iha mídia maka sira hotu iha kompromisu no iha vontade katak atu halakon Lei Pensaun Vitalísia. Ita hotu aseita iha ona akordu ne’ebé ita hotu respeita akordu. Kuandu viola maka asaun kontinua la’o,” Estudante ne’e hato’o ba Ajénsia TATOLI iha resintu Parlamentu Nasionál hafoin halo audiénsia ho reprezentante husi bankada parlamentár, Kuarta ne’e.
Notísia relevante : PNTL identifika ona ema na’in-12 ne’ebé tama manifestasaun inklui sunu karreta
Nia dehan, tuir akordu ne’ebé bankada parlamentár no UETL halo ona, determina katak iha semana oin sei iha debate Lei Pensaun Vitalísia iha faze jenaridade.
“Iha loron 25 mak sira la reuniaun, ita obriga para sira halo reuniaun, sira tenke respeitu akordu. Kuandu sira la halo reuniaun, ita sei bá hasoru sira atubele halo diskusaun ba ida-ne’e, se laiha diskusaun ita reativa fali asaun,” nia katak.
Portavós UETL dehan, bankada parlamentár lima kompromete atu halakon Lei Pensaun Vitalísia.
“Ida-ne’e mak ita-nia kompromisu, ita iha akordu ita tenke kumpre ba akordu, se ita la respeita ba akordu, sé de’it mak viola akordu asaun tenke bá hasoru hodi husu sira,” Cristovão Mauto katak.
UETL semana oin sei suspende manifestaun hodi akompaña prosesu sira ne’ebé la’o iha Parlamentu Nasionál.
“Apartir segunda semana oin ita suspende tiha lai asaun manifestasaun no akompaña prosesu sira ne’ebé Deputadu sira sei halo iha loron 25 setembru ne’e,” nia tenik.
Iha dadeer ne’e, Portavós UETL na’in-10 hasoru malu ho reprezentante bankada lima, ne’ebé akompaña husi Segundu Komandante Jerál Polísia Nasionál Timor-Leste (PNTL), Komisáriu Polísia Pedro Belo no Ofisiál Superiór PNTL sira hodi hato’o sira-nia ezijénsia sira.
Manifestante sira ne’ebé kompostu husi estudante universitáriu no sosiedade sivil inklui entidade oinoin kontinua hato’o sira-nia ezijénsia haat ba Parlamentu no Governu hanesan hapara kultura sosa luxu ba membru foun Parlamentu, halo altersaun ba Lei Pensaun Vitalísia, altersaun ba Lei Manifetasaun no Liberdade Reuniaun no husu aloka orsamentu ho persentajen boot setór produtivu no infraestrutura iha baze.
Iha loron Tersa (16/09) Parlamentu Nasionál liuhusi sesaun plenária estraordinária, aprova ho unanimidade rezolusaun kansela akizisaun karreta ba membru 65 Parlamentu.
Jornalista : Natalino Costa
Editora : Julia Chatarina
