BOBONARU, 17 Setembru 2025 (TATOLI) – Iha implementasaun ba programa pilotu ba Risk Communication and Community Engagement (RCCE) Rabies iha munisípiu Bobonaru, ekipa Servisu Munisipál Saúde vasina ona vítima asu tata hamutuk na’in 65, husi totál alvu 100-resin.
Diretór Servisu Munisipál Saúde Bobonaru, Gil Bernardo Vicente, konfirma katak ema hirak ne’ebé simu vasina mai ho idade labarik, joven no adultu.
“Liuhusi kampaña ne’e ami konsege vasina ema na’in 65, hela 30-resin mak seidauk, maibe ita nafatin tenta buka tuir sira”, dirijente ne’e dehan informa.
Durante kampaña, ekipa konjunta vizita família hamutuk 316 no halo promosaun ba estudante hamutuk 1.991, kompostu husi feto 1.064 no mane 927, iha Eskola Bázika Sentrál no filiál 14.
Gil Vicente haktuir katak implementasaun kampaña “dor to dor” ne’e la’o ho di’ak, tanba komunidade no estudante sira partisipa másima.
“Iha balun mak ladún koopera ho ita-nia informasaun ne’ebé hato’o sira, maibé ita nafatin halo promosaun, tanba sira hatene ona informasaun katak moras ida-ne’e mak kona sei laiha salvasaun, ita mós sei mate, entaun to’o ikus sira koopera”, nia relata.
Responsavel ne’e mós husu ba vitima asu tata atu hakbesik an bá instalasaun saúde ne’ebé besik hodi simu vasina no kompleta doze to’o dala lima.
“Agora, vasina sufisiente ona. Ami fó korajen ba sira atu kompleta vasina, tanba vasina dala ida de’it la garante, entaun tenke vasina kompleta, tanba nia doze ne’e tuir persentajen. Se ita vasina ida de’it, nia bele halo protesaun ne’e iha 25% de’it, se dala rua 50%, dala tolu 65%, entaun ita vasina dala haat ou lima hanesan ne’e nia kompleta ona 100%”, nia esplika.
Iha atividade kampaña durante loron neen ne’e ekipa husi Diresaun Servisu Munisipál Agrikultura, Autoridade Munisípiu Bobonaru, mós konsege vasina asu hamutuk 102.
Governu ho parseiru sira lansa urjentemente kampaña ne’e iha Bobonaro atu hametin konxiénsia komunidade nian no hamenus kazu ba asu tata no mate tanba moras raiva.
Kampaña ne’e lansa, 08 Setembru, iha Eskola Bázika Sentrál Victor Santa Maliana, hodi marka inísiu husi inisiativa ida durante loron haat ne’ebé foka ba fatin 15 ne’ebé ho risku aas
iha Maliana ho Atabae, zona sira ho kazu tata asu nian ne’ebé relatadu liu.
Atividade sira ne’e sei kobre eskola 18 iha suku neen, hahú ho sesaun eskola iha
dadeer no habelar ba komunidade sira ne’ebé haleu besik eskola iha loraik.
Lansamentu ne’e realiza hodi promove komportamentu seguru, informa kona-ba prevensaun no estimula partisipasaun ativa husi família sira.
Notisía relevante: Governu no parseiru lansa kampaña envolvimentu komunitáriu ba prevensaun moras raiva
Jornalista: Sergio da Cruz
Editora: Maria Auxiliadora
