DILI, 18 Setembru 2025 (TATOLI)—Vise- Ministru Asuntu Parlamentár (V-MAP), Aderito Hugo da Costa, hateten tuir planu Governu sei hahú reestrutura Institutu Públiku (IP) no Empreza Públiku (EP) iha fulan-Janeiru tinan 2025 hodi ajusta ho Orsamentu Jerál Estadu (OJE) 2026 nian, tanba daudaun ne’e Governu halo hela prosesu elaborasaun ba reestruturasaun.
Notísia Relevante: TATOLI-RTTL la tama iha lista reforma I.P no E.P
Governu lori tempu tinan ida resin ka tinan rua, ne’ebé halo diagnóstika ida ba dezempeñu ida-ne’e hotu, tenta katak tenke halo reestruturasaun tanba balun dupla portofóliu no mós haree husi klasifikasaun oioin tanba ne’e haree ba efisiénsia no efikásia servisu kontrolu finanseiru administrativa nian.
“Primeiru-Ministru kompromitidu katak tenke reestrutura, entaun esforsu tenke lalais uitoan para depois bele ajusta refleta iha proposta orsamentu 2026 nian,” Vise-Ministru ne’e informa ba jornalista sira iha Palásiu Governu, Dili, ohin.
Signifika, nia dehan, tenke refleta iha proposta orsamentu ne’ebé Governu tenke aprezenta ba PN iha Outubru ne’e, desizaun finál seidauk iha no sei iha duni tenke lalais, nune’e depois refleta iha proposta orsamentu 2026 ne’e.
Enkuantu, nia haktuir, daudaun ne’e ministériu hotu-hotu ne’ebé tutela ba I.P no E.P sira inklui ministériu la tutela ba I.P ho E.P, submete ona sira-nia opiniaun sobre medida reforma ka reestruturasaun ba instituisaun indireta Estadu nian, ne’ebé durante goza outonómia finanseira administrativa patrimóniu.
“Tamba ne’e, Primeiru-Ministru kontinua nafatin loke diskusaun no rona husi entidade relavante hotu-hotu liuliu liña ministeriál sira-ne’ebe tutela ba I.P no E.P hodi foti desizaun final,” nia esplika.
Jornalista : Alexandra da Costa
Editór : Cancio Ximenes
