DILI, 18 Setembru 2025 (TATOLI)—Vise-Primeiru-Ministru, Ministru Koordenadór Asuntu Ekonómiku no Ministru Turizmu Ambiente, Francisco Kalbuadi Lay, kinta ne’e, iha reuniaun KOnsellu Ministru aprezenta projetu konstrusaun Sentru Internasionál Konvensaun Dili (SIKD) ne’ebé prevee ba zona Portu Dili nia sorin.
Iha dokumentu ofisial afirma, empreendimentu sei sai hanesan marka arkitetóniku no símbolu transformasaun nasionál liuliu iha kontestu integrasaun ba ASEAN.
“Kompleksu ne’e sei inklui edifísiu prinsipál ba Sentru Internasionál Konvensaun Dili ho sala konferénsia, auditóriu no pavillaun espozisaun nian. Nune’e mós área komplementár lazer no turizmu nian, inklui paseiu ida, akuáriu ida no sentru entretenimentu no komérsiu ida,” refere nota ne’ebé Agência Tatoli asesu, ohin.
Objetivu husi projetu ne’e, atu revitaliza kapitál nia tasi-ibun no halo Dili sai destinu ba eventu internasionál boot sira.
Alende ne’e, atu promove turizmu, hasa’e ekonomia no kria oportunidade foun ba komunidade lokál.
Jornalista : Alexandra da Costa
Editor : Cancio Ximenes
