MF prepara livru anuál rezulatdu tetu OJE 2026 antes submete ba PM
DILI, 18 Setembru 2025 (TATOLI)–Ministra Finansa, Santina José Rodrigues Cardoso, hateten daudaun ne’e sira sei prepara hela livru anuál ida kona-ba rezultadu tetu Orsamentu Jerál Estadu (OJE) 2026 antes submete ba Primeiru-Ministru iha reuniaun Konsellu Ministru.
Notísia Relevante: Tetu indikativu ba OJE 2026 hamutuk billaun $1,85
Tuir nia, posibilidade iha fulan oin sira bele lori ona mai halo aprezentasaun iha Konsellu Ministru hodi halo aprovasaun no kontinua lori ba Parlamentu Nasionál (PN) iha loron 01 Outubru 2025 tuir lei neʼebé iha ona.
“Daudaun ne’e ha’u seidauk bele hateten kona-ba montante revizaun orsamentu ne’e. Bainhira forma ona ba lei no livru ne’e mak foin ha’u bele hateten rezultadu husi orsamentu neʼebé tetu no indikasaun inklui aprovasaun ikus ba Konsellu Ministru,” Ministra Finansa ne’e informa ba jornalista sira iha Palásiu Governu, ohin.
Aleinde ne’e, nia hatutan, MF mós haree katak ministéria sira nia ezekusaun iha trimetre datoluk ne’e avansadu maske iha trimestre dahuluk no daruak nian ne’e rezulatdu eskusaun tuun, maibé ne’e atu hateten de’it katak orsamentu sei iha.
“Daudaun ne’e mós Governu konstitusionál da-IX hamutuk ho Komisaun Funsaun Públiku (KFP) halo hela ezersísiu ida hodi identifika kona-ba númeru funsionáriu permanente, destakadu, kondisaun moras no balun tama idade reforma no prosesu ne’e agora la’o hela sei konklui ba oin,” nia dehan.
Jornalista : Alexandra da Costa
Editór : Cancio Ximenes
