DILI, 18 Setembru 2025 (TATOLI)–Ministru Justisa (MJ), Sergio Hornai, hateten mia parte , kontaktu malu hela ho Federasaun Futeból Timor-Leste (FFTL) hodi tetu no haree hamutuk prosesu konstrusaun Estádiu Munisipál Dili no Tasi-Tolu.
Notísia Relevante: FFTL-Igreja diskute fatin konstrusaun estádiu iha Tasi-Tolu
“Ita sempre kontaktu ho FFTL liuhusi telefone, diskusaun balun ne’ebé mak halo, halo daudaun hela. Sira manifesta sira-nia interese atu nune’e Ministériu Justisa bele haree hamutuk ho sira atu atribui rai hodi konstrui Estádiu Munisipál Dili no Tasi-Tolu,” Ministru Sergio hateten ba jornalista sira iha Palásiu Governu, Dili, kinta ne’e.
Ministériu Justisa haree dominiu privadu Estadu, hodi nune’e bele providénsia ba atividade sira-ne’ebé atu halo atividade dezenvolvimentu iha modalidade desportivu.
“Nia prosesu ita hein kuandu iha ona desizaun balu mak foin hakat ba oin. Tanba, ita iha interministeriál, ita iha Ministériu Juventude Desportu Arte no Kultura (MJDAK), Ministériu Planeamentu Investimentu Estratéjiku (MPIE), Ministeériu Finansa (MF) no sosiedade gosta bola nia hanoin, ho sira-ne’e hotu mak ita foin hetan desizaun ida di’ak, atu foti desizaun iha pasífika sira,” nia dehan.
Nia informa, kona-ba Estádiu Dili antes ne’e iha ona akordu husi Governu anteriór no FFTL, maibé agora Governu atuál sei haree fila-fali akordu referidu hodi hadi’a iha parte balun foin bele avansa ba oin.
Estádiu Dili no Tasi-Tolu hetan apoiu fundu husi Federation International Football Asosiation (FIFA) no tama iha pakote ida no hetan ona autorizasaun husi Konsellu Ministru hodi konstrui iha fatin rua (2) ne’ebé definidu.
Notísia Relevante: Governu prepara millaun $5 ba dezenvolvimentu turizmu relijiozu iha Tasi-tolu
Jornalista : Hortencio Sanchez
Editór : Cancio Ximenes
