Top

MP husu Tribunál aplika pena  justu ba arguidu antigu Enkarregadu Timor-Leste iha Jenebra

Tribunál Judisiál Primeira Instánsia Dili. Imajen TATOLI/António Daciparu

DILI, 18 Setembru 2025 (TATOLI)–Tribunál Judisiál Primeira Instánsia Dili (TJPID), Kinta ne’e, kontinua halo julgamentu ba kazu pekulatu ne’ebé envolve husi antigu Enkarregadu Negósiu Timor-Leste iha Jenebra, Francisco Deonísio Soares ‘Maukura’, iha tinan 2019.

Iha audiénsia julgamentu ne’e, Tribunál koletivu ajendadu prosesu ba iha faze alegasaun. Iha sala julgamentu, Prokuradór Titulár ba prosesu ne’e, João Marques deklara katak, iha akuzasaun arguidu Francisco Maukura konfesa faktus balun katak, momentu ne’ebá orsamentu haruka tarde, tanba ne’e arguidu halo empréstimu ba osan operasionál Embaixada nian.

Tuir Prokuradór, João Marques katak, lei la permite atu uza osan operasionál ba interrese privadu, tanba ne’e Ministeriu Públiku (MP) konsidera arguidu nia aktu priénse ba krime pekulatu, ne’ebé previstu no punidu tuir artigu 82 númeru 1 husi Lei nú. 7/2020 26 Agostu kona-ba Lei Medida Prevensaun Kombate Korrupsaun (MPCC, sigla portugés).

Notísia relevante : Tribunál julga eis-enkarregadu negósiu TL ba Jenebra ho krime pekulatu

Maibé, durante iha julgamentu ba kazu ne’e, arguidu Maukura deklara katak nia parte devolve ona osan operasionál ne’ebé nia halo impréstimu.

“Tanba ne’e, Ministériu Públiku liuhusi Prokuradór ne’ebé Titulár ba prosesu ne’e konklui katak, arguidu nia aktu priense ba krime ne’ebé iha, ho nune’e mak solisita ba Tribunál Koletivu ida-ne’e atu tetu deklarasaun hotu arguidu nian ba kazu ne’ebé mak nia rasik deklara katak arguidu devolve ona osan empréstimu ne’ebé nia foti no husu atu kondena arguidu ho pena ne’ebé justu,” João Marques deklara iha sala julgamentu.

Enkuantu, Defeza husi arguidu Francisco Maukura, Defensór Públiku, José Maria Guterres deklara katak, momentu ne’ebá situasaun Covid-19 orsamentu haruka ba tarde afeta ba Enkarregadu Timor-Leste iha Jenebra nia serbisu. Tanba ne’e, momentu ne’ebá arguidu foti osan operasionál hodi ezerse ba vida moris.

“Arguidu nia aktu la prense ba krime pekulatu ne’ebé Ministériu Públiku akuza, tanba intensaun atu foti osan laiha. Osan ne’ebé arguidu halo empréstimu, momentu ne’ebá banhira Estadu halo transferénsia osan ba Enkarregadu no arguidu devolve kedan osan ne’ebé maka halo empréstimu no bainhira devolve osan liu tiha ne’ebé momentu nia halo empréstimu,” nia deklara.

Defeza arguidu nia deklara katak, momentu ne’ebá arguidu nia osan privadu balun arguidu devolve hotu. Tanba ne’e, defeza konsidera arguidu nia aktu la prense ba krime pekulatu ne’ebé MP imputa ba nia.

“Ho nune’e, husu ba Tribunál Koletivu atu absolve arguidu husi krime ne’ebé Ministériu Públiku imputa ba arguidu,” nia tenik.

Hafoin rona tiha parte hotu, Tribunál marka fali julgamentu ne’e ba loron seluk hodi rona leitura akordaun.

Jornalista     : Natalino Costa

Editora          : Julia Chatarina

Publisidade

Leave a Reply

Latest Post

error: Content is protected !!