DILI, 18 Setembru 2025 (TATOLI)–Ministru Juventude, Desportu, Arte no Kultura (MJDAK), Nelyo Isaac Sarmento, informa iha fulan-Outubru ne’e MJDAK sei realiza festivál kulturál no jogu forenteira iha munisípiu Kovalima.
Notísia Relevante: Festivál kulturál amizade iha Oecusse hametin relasaun TL-RI
“Fulan ne’e to’o Dezembru, ita iha atividade tolu importante mak iha fulan-Outubru ne’e ita sei hala’o festivál kultural iha Kovalima, ne’e inklui mós jogu fronteira,” Ministru Nelyo hateten ba Agência Tatoli iha Palásiu Governu, Dili, kinta ne’e.
Festivál ne’e instituisaun tolu mak prepara hanesan MJDAK, Sekretária Estadu Arte Kultura (SEAK) no Sentru Nacional Chega (CNC, sigla portugés).
“Festivál Kulturál ne’e sei hala’o atividade diálogu entre joven sira, ida-ne’e relasaun ho relatóriu husi CAVR ‘Chega!’ no husi relatóriu CAVA ‘Memoriam Ad Spem”. Ita halo semináriu troka informasaun entre joven sira iha Timor-Leste no joven sira hela iha Timor Osidentál no iha mós feira kulturál,” Nelyo informa.
Atividade ne’e sei inklui mós festivál múzika ne’ebé envolve husi grupu sira Timor Osidentál no Timor-Leste rasik hodi anima no harame Festivál Kulturál ne’e.
Governu liuhusi MJDAK sei aloka orsamentu hamutuk rihun $150 hodi finansia atividade hotu iha Festivál ne’e inklui jogu fronteira.
Jogu Fronteira sei iha atividade sira hanesan halai taru kuda, sei iha jogu futeból entre atleta sira husi Timor Osidentál hanesan Kefa, Atambua, Malaka no Timor-Leste nian mak hanesan Bobonaru, Oekusi no Kovalima.
Jornalista : Hortencio Sanchez
Editór : Cancio Ximenes
