OEKUSI, 19 Setembru 2025 (TATOLI) – Komunidade sira iha suku Suni-Ufe sub-rejiaun Nítibe sente triste ho projetu alargamentu estrada iha suku Suni-Ufe tanba hamosu rai-rahun maka’as hodi fó impaktu ba komunidade sira-nia saúde no uma hela fatin.
Tan nee’e, abitante Helena Suni Colo, rekomenda ba Autoridade Rejiaun Administrativa Espesiál Oekusi Ambeno (RAEOA), atu orienta empreza konstrutora atu rega, tanba rai-rahun bele afeta ba komunidade sira-nia saúde.
“Karik bele orienta netik kompañia atu rega, tanba lor-loron rai-rahun maka’as, laiha karreta ida atu mai rega, sira entaun ami-nia uma laran, liu-liu bikan no sasán seluk rai-rahun hotu, aat liu mak ita ema, bele provoka moras,” nia dehan iha suku Suni-Ufe, ohin.
Notísia relevante:Abitante Suni-ufe preokupa ho projetu alargamentu estrada ne’ebé estraga lutu no plantasaun
Xefe Departamentu Ponte Estrada no kontrolu Seias, Cornelio Seran, rekoñese no sei koordena ho parte empreza atu rega, loron ida dala rua.
“Preokupasaun komunidade sira ba rai-rahun barak, los duni, ne’ebé ha’u hato’o ba kompañia, no fó hanoin nu’udar timoroan hanoin povu mós, atu-bele rega netik, loron ida, pelu-menus dala rua, dadeer no lorokraik,” nia promete.
Notísia relevante:KAFI Oekusi aprova empreza tolu reabilita estrada kilometru 23 liu
Entretantu, tuir observasaun jornalista Ajénsia TATOLI,I.P, nota katak, projetu alargamentu estrada ne’e, fó impaktu tebes ba labarik sira no adultu tanba movimentu transporte hamosu rai-rahun maka’as.
Projetu alargamanetu estrada ne’e, nu’udar projetu emerjénsia ne’ebé ezekuta husi empreza Lifau Indah ho distánsia kilometru-ualu, hahú husi Oénunu suku Suni-Ufe to’o aldeia Bona suku Usitaku.
Jornalista: Abílio Elo Nini
Editór: Rafael Ximenes de A. Belo
