VIKEKE, 19 Setembru 2025 (TATOLI)—Diretór Servisu Edukasaun Munisípiu Vikike, Júlio Sakadura informa autoridade Munisípiu Vikeke fó ona autorizasaun ba empreza hodi kontinua konstrusaun projetu Pré-Eskolár Kabira-Oan, Postu Administrativu Vikeke Vila.
Antes ne’e, iha 03 Dezembru 2024, Prezidente Autoridade Munisípiu (PAM) Vikeke, Francisco Cruz Simões de Gonzaga Soares akompañadu husi Komandante Polísia Nasionál Timor-Leste (PNTL) Munisípiu Vikeke, Superintendente António Rego Fernandes, vizita direta ba fatin projetu konstrusaun edifísiu foun ba eskola pré-eskolár, iha área Kabira-Oan, Suku Karaubalu, Postu Vikeke Vila, halo atuasaun ba empreza hodi hapara projetu konstrusaun edifísiu pré-eskolár ho razaun tékniku sira husi Ministériu Edukasaun (ME) la halo estudu kle’an bá fatin konstrusaun, fatin ne’e risku ba dezastre no afeta mós ba estudante sira.
Notísia relevante: https://tatoli.tl/2024/12/03/pam-viqueque-hapara-projetu-konstrusaun-edifisiu-pre-eskolar-iha-cabira-oan/
“Maibé, foin lalais ne’e, edukasaun nasionál parte insfraestutura sorumutu ho autoridade Munisipiu Vikeke hodi fó autorizasaun no deside empreza implementadór atu kontinua servisu konstrusaun ba edifísiu eskola pré-eskolár,” Júlio Sakadura ba TATOLI iha Postu Vikeke Vila, Sesta ne’e.
Júlio haktuir fatin risku sira-ne’ebé afeta ba eskola pré-eskolár diresaun infraestutura husi ME bá haree direta ona, depoiz prosesu konstrusaun edifísiu ne’e finaliza mak konstrui fali morru protesaun ba área sira- ne’ebé risku.
“Ami mós bá haree ona fatin risku ne’ebé afeta ba eskola liuliu parte estrada bá torre nian sai hanesan risku, maibé aban-bainrua konstrusaun finaliza ME sei konstrui morru protesaun nune’e asidente ruma akontese labele afeta ba ita-nia estudante sira no edifísu,” nia hato’o.
Júlio hatutan agora daudaun ne’e parte empreza ho ninia traballadór sira kontinua servisu konstrui edifísiu pré-eskolár nian, badaen sira hada ona bloku no fui ona sinta jerál uma nian.
Entretantu, projetu konstrusaun edifísiu pré-eskolár husi ME ne’ebé hahú halo konstrusaun fízika iha fulan-Outubru 2024 no finaliza fulan-Marsu 2025. Obra ne’e gasta orsamentu hamutuk $108.251,35. Projetu referidu responsabiliza husi empreza Carnesia Rekordasaun Unip, Lda.
Jornalista: Vitorino Lopez da Costa
Editór: Xisto Freitas da Piedade
