DILI, 19 Setembru 2025 (TATOLI) – Bankada Partidu Kongresu Nasionál Rekonstrusaun Timorense (CNRT, sigla portugés), Partidu Demokrátiku (PD) no Kmanek Haburas Unidade Nasionál Timoroan (KHUNTO) aprezenta ona ba meza Parlamentu Nasionál projetu lei revogasaun Pensaun Mensál Vitalísia ba Deputadu no Eis Titulár Órgaun Soberania no Providénsia sira seluk.
Projetu lei ne’e revoga Lei númeru 1/2007, 18 Janeiru, no Lei númeru 7/2007, 25 Jullu, relativu pensaun no regalia ba deputadu no titulár órgaun soberania.
Vise bankada CNRT, Patrocínio dos Reis Fernandes, hateten inisiativa ne’e aprezenta tanba konsisténsia ho deklarasaun bankada Governu nian kona-ba projetu halakon totál pensaun vitalísia. “Projetu ami submete tiha ona ba meza [PN], favór meza baixa hamutuk para ita haree”, nia hato’o iha reuniaun plenária estraordinária Parlamentu Nasionál, ohin.
Maski nune’e, Patrocínio dos Reis seidauk pronúnsia detallu kona-ba konteúdu husi projetu ne’e.
Prezidente Interinu Parlamentu Nasionál no atuál Segundu Vise-Prezidente Parlamentu, Alexandrino Afonso Nunes, dehan meza iha ona projetu lei rua. “Ne’ebé ami konvida Prezidente Komisaun A [asuntu Konstitusionál no Justisa] atu bele mai oin, baixa hela dokumentu ne’e [projetu lei foun]”, nia hato’o.
Iha sorin seluk, Parlamentu Nasionál aprova ona pedidu urjénsia kona-ba projetu Lei númeru 10/VI(3a) Rejime Jurídiku Seguransa Sosiál ba Titulár Órgaun Soberania ho unanimidade, votu a favór 59, kontra no abstensaun 0. Projetu ne’e aprezenta husi bankada opozisaun FRETILIN no PLP.
Daudaun ne’e, Komisaun A trata hela projetu lei rua Rejime Jurídiku Seguransa Sosiál no revogasaun Lei númeru 1/2007, 18 Janeiru.
Notísia relevante: PN aprova ho unanimidade pedidu urjénsia projetu Lei Rejime Jurídiku Seguransa Sosiál
Jornalista: Nelson de Sousa
Editora: Maria Auxiliadora
