DILI, 02 Setembru 20025 (TATOLI)–Primeiru-Ministru, Kay Rala Xanana Gusmão husu ba jerasaun foun sira tenke hanoin di’ak hodi kontribui ba nasaun liuhusi meiu hotu, tanba futuru Timor-Leste iha foinsa’e sira nia-liman.
Notísia Relevante: Xanana husu PAM sira servisu hamutuk ho povu dezenvolve nasaun
Jerasaun foun sira tenke hanoin ba saida mak nia bele halo hodi labele ba estuda de’it buka mak atu sai funsionáriu públiku maibé tenke hanoin oinsá kontribui ba dezenvolvimentu nasaun nian.
“Susar boot, agora ita bolu malu butuk (ense) hamutuk iha Ministériu sira-ne’e, sé mak atu dezenvolve ita-nia rain ne’e. Mak ita bolu investór sira husi li’ur mai, ikus ita ba sai seguransa, lori karreta, hamos-fo’er, entaun ita mak nune’e hela de’it,” Xefe Governu hateten bainhira sai oradór prinsipál iha semináriu nasionál ne’ebé realiza husi Prezidente Repúblika José Ramos-Horta ho tema “Papél jerasaun foun iha kontextu dezenvolvimentu nasionál hodi hatutan obra jerasaun tuan”, iha Palásiu Prezidensiál Nicolau Lobato, Bairru Pite, tersa ne’e.Iha okaziaun ne’e, nia husu mós ba joven hirak ne’ebé hetan ona servisu no balun sei eskola hela, tenke hanoin bainhira iha matenek uitoan utiliza matenek ne’e halo didi’ak tanba laiha ema ida atu halo buat hotu-hotu.
“Joven sira-ne’ebé hetan ona servisu, sira-ne’ebé sei eskola hela, iha matenek uitoan utiliza didi’a matenek sira-ne’e, tanba laiha ema ida mesak halo buat hotu-hotu. Kolabora ba malu, hanoin, fó hatene ba malu atu bele hetan objetivu-komun, atu hadi’a rai no povu ida-ne’e,” nia esplika.
Biban ne’e, Xanana Gusmão nafatin apela ba joven sira atu hadook-aan husi violénsia hamutuk fó liman ba malu hodi dezenvolve nasaun ne’e ba oin.
“Joven sira agora, imi daudaun futuru jerasaun rai ida-ne’e nian, imi nunka atu haluha asaun ne’ebé jerasaun tuan sira halo. Imi tenke ejije ba malu nafatin, ita atu la’o ba oin ona, se ita temi nafatin ida-idak tenke hanoin katak ha’u atu sai saida loos, ha’u-nia inan-aman hakarak ha’u atu sai saida. Ba imi sira enfrenta difikuldade sira-ne’e, tenke iha hanoin ida ho vizaun ba futuru,” Xanana hateten.
Bainhira joven laiha vizaun ba futuru mak moris laiha mudansa no marka-pasu iha fatin ka la’o iha fatin de’it.
“Se ita la haka’as-an hodi duni ita nia futuru mak ita sei nafatin iha fatin, tenke iha vizaun ida ba futuru, atu fó ezemplu ba sira-ne’ebé mak agora aprende hela atu sai sidadaun, tenke iha vizaun ba future. Kuandu ita iha vizaun ba futuru ona, ita hatene ona atu hala’o knar ho di’ak. Dalaruma vizaun ba futuru ne’e buat hotu halo kedan ona aban, ne’e labele. Iha ona vizaun ba futuru tenke hatene halo uluk saida, halo tan saida ho nune’e mak imi bele dezenvolve imi-nia kbiit atu hatene nasaun ne’e atu ba oin oinsá,” nia dehan.
Dalaruma joven balu hakarak hatene buat barak hodi hatudu nia iha hanoin maibé kbiit la-to’o atu halo.
“Vizaun ba futuru hakarak Timor ne’e atu sai oinsá. Ba joven-sira labele hanoin ha’u tenke ba tuur iha Governu, ba tuur iha Parlamentu, ida-ne’e egoizmu demais, individualizmu demais,” nia hateten.
Iha diálogu nasionál ne’e partisipa másimu husi estudante Universidade sira iha Dili laran no foinsa’e intelektuál sira no membru Governu balun.
Jornalista : Hortencio Sanchez
Editór : Cancio Ximenes
