DILI, 19 Setembru 2025 (TATOLI) –Diretora Institutu Nasionál Dezenvolvimentu Mão-de Obra (INDMO), Isabel de Lima, ho delegasaun sira husi Semana Abilidade Internasionál ba daruak hala’o vizita bá kafé fatin iha National Cooperative Business Association (NCBA), iha postu administrativu Railaku, munisípiu Ermera.
Isabel de Lima informa katak delegasaun sira ne’ebé vizita kafé iha munisípiu Ermera hamutuk na’in-hitu, rua husi Austrália, haat Malázia no ida husi Indonézia.
Vizita ne’e hola parte ba loron ikus eventu Semana Abilidade Internasionál ba daruak ne’ebé hala’o iha Dili.
“Objetivu ita-nia delegasaun sira bá vizita kafé iha Ermera atu hatene kona-ba prosesu kultivu kafé, tanba kualidade kafé Timor-Leste nian konsidera ho kualidade internasionál ne’ebé di’ak tebes”, dirijente ne’d hateten iha Sentru Konvensaun Dili, ohin, hafoin fila husi Ermera.
Delegasaun sira ne’e hakarak tebes vizita Ermera, tanba atu haree diretamente maneira kuda kafé, haki’ak no to’o ku’u hodi prosesa sai kafé uut tanba durante ne’e rona de’it, maibé seidauk haree ho matan.
“Molok vizita kafé iha Railaku, ami liuhusi Sentru Formasaun Don Bosco Comoro no Sentru Formasaun Tíbar hodi haree fatin formasaun indústria eletrónika nian”, dehan.
Aleinde ne’e, delegasaun sira ne’e balu sei vizita fatin turístiku sira iha Díli, Arkivu no Muzeu Rezisténsia Timorense (AMRT), Tais Merkadu, Kristu Rei, no instituisaun balun hanesan Fakuldade Enjeñaria, Siénsia no Teknolojia iha Universidade Nasionál Timor Lorosa’e (UNTL), no Autoridade Nasionál Petróleu no Minerál (ANPM).
Notisía relevante: Semana Abilidade Internasionál 2025: Impulsiona inovasaun ba integrasaun globál
Jornalista: Arminda Fonseca
Editora : Maria Auxiliadora
