Jogadora estranjeira na’in-haat sei reforsa VDL FC
DILI, 19 Setembru 2025 (TATOLI)—Ekipa VDL FC sei kontrata jogadora estranjeira husi Kupang, Nusa Tenggara Timur (NTT), Indonézia, atu reforsa ekipa bainhira hakat ba primeira divizaun Liga Futeból Femininu Timor-Leste (LFFTL).
Prezidente Klube VDL FC, Dom Savio Lopez esplika jogadora na’in-haat referidu antes ne’e joga iha klube Bintang Timur iha-ne’ebé na’in-rua mak agora reforsa ona VDL hodi kompete iha faze apuramentu, enkuantu na’in-rua seluk tuir planu sei reforsa tan iha inisiu fulan-Outubru antes hahú primeira divizaun LFFTL.
“Antes ba primeira divizaun, ami-nia preparasaun kontratu jogadora na’in-haat hodi reforsa ekipa ho durasaun kontratu tinan-tolu,” Savio Lopez informa ba TATOLI iha Estádiu Munisipál Dili, Sesta ne’e.
Notísia relevante: VDL FC garante kompete iha primeira divizaun LFTL
Savio Lopez relata jogadora na’in-rua ne’ebé atualmente reforsa ekipa iha kompetisaun kualifikasaun apuramentu mak Garcia Tallo no Tetti, enkuantu jogadora rua seluk seidauk fó-sai naran tanba iha faze finalizasaun kontratu.
“Ami deside na’in-haat tanba tuir regulamentu husi komisaun fó-sai limita kuota jogadora estranjeira,” Savio akresenta.
Entretantu, VDL FC deside lakohi halo komentáriu ba valór orsamentu kontratu relasiona ho jogadora estranjeiru na’in-haat referidu tanba konsideradu nu’udár sijilu klube nian.
Jornalista: Natalino Belo
Editór: Xisto Freitas da Piedade
