DILI, 19 Setembru 2025 (TATOLI)–Polísia Nasionál Timor-Leste (PNTL) liuhusi Komandante Jerál Komisáriu Jerál Polísia Henrique da Costa, husu deskulpa ba Universidade Nasionál Timor-Leste (UNTL) tanba liga ho membru Polísia balun ne’ebé halo atuasaun ba Estudante Universitáriu Timor-Leste (UETL) foin daudaun, ne’ebé tama to’o saladeaula hodi baku estudante sira.
Nia rekoñese iha fallansu bainhira membru Polísia buka tuir autór ne’ebé tuda durante manifestasaun iha loron 15 to’o 17 Setembru, tama to’o saladeaula universidade públiku ne’e.
“Depois ida-ne’e, ha’u rasik konvida alin reprezentante estudante na’in-16 sira mai halo diálogu ho PNTL iha Komandu Jerál, ha’u rasik husu deskulpa ba sira no ha’u dehan ba sira situasaun akontese la’ós iha intensaun atu interven alin sira-nia atividade eskola nian,” Komandante Jerál hateten ba Jornalista sira, iha Kuartel Jerál PNTL, Kaikoli, Sesta ne’e.
Notísia relevante : Loron daruak: Membru PNTL ida no estudante na’in-tolu hetan kanek
Henrique dehan, situasaun sira ne’e mosu tanba iha buat balun mak provoka, tanba bainhira manifestasaun la’o hakmatek maka membru Polísia sira sei la halo buat ida, maibé bainhira lansa fatuk sai maka halo Polísia sira kanek no manifestante sira mós kanek.
“Tanba ne’e mak tenke buka tuir tanba fatuk tuda husi ne’ebá, entaun ita buka tuir autór ida iha parte ne’ebá. Tanba ne’e mak PNTL sira tama bá laran hodi haruka estudante sai, maibé mosu insidente iha sala laran, katak Polísia baku estudante sira ne’ebé tuur iha sala laran,” nia haktuir.
Komandante Jerál afirma, PNTL sira-nia prezensa iha ne’ebá hodi asegura parte hotu no asegura estudante universitáriu sira atu nune’e bele hato’o hanoin ba parte ida-ne’ebé mak estudante sira atu ko’alia ba. “PNTL sira iha ne’ebá la’ós atu impede.”
Komisáriu Jerál PNTL ne’e haktuir katak durante manifestasaun iha loron-tolu nia laran, iha ema balun aproveita manifestasaun hodi halo krime hasoru parte seguransa sira.
Henrique husu kuandu lamenta ho atuasaun Polísia nian ba ema hotu liga ho asaun manifestasaun ne’ebé foin daudaun ne’e, iha buat balun mak Polísia halo la tuir lei no orden, maka bele hato’o keixa ba Komandu Jerál PNTL.
“Ami mós hein hela ema sé mak la satisfaz ho atuasaun ami-nian bele mai hato’o keixa, tamba lei ne’e ba ema hotu, hato’o prosesu ba ami protu ba hatán,” nia katak.
Jornalista : Natalino Costa
Editora : Julia Chatarina
