Loron daruak: Membru PNTL ida no estudante na’in-tolu hetan kanek
DILI, 16 Setembru 2025 (TATOLI)—Xefe Interina Sentru Saúde Internamentu Formosa, Juleta Canelas, informa manifestasaun ne’ebé realzia husi Estudante Universitariu Timor-Leste (EUTL) ba loron daruak ne’e rezulta vítima estudante kanek na’in-tolu (3) inklui membru PNTL na’in-ida (1) hetan kanek no halo tratamentu saúde iha Sentru Saúde Formosa.
Notísia Relevante: PNTL husu labele halo anarkizmu, CNRT-PD-KHUNTO kansela sosa Prado
“Loos duni, ohin, tama ona loron daruak Sentru Saúde formoza halo atendementu ba pasiente sira na’in-haat (4) no horisehik na’in-lima (5),” Juleta Canelas hateten ba jornalista sira, iha sentru saúde Formosa, ohin.
Nia esplika, ohin ne’e, mane hotu inklui mós membru PNTL ida mak hetan tuda, maibé la grave no vítima sira mai halo tratamentu sira fó tratamentu tiha nia fila kedas, agora daudaun iha alin mane ida husi UNTL mak sei observa karik orsida di’ak mós fila ona.
Nia dehan, sira na’in-haat (4) ne’e kazu ketak-ketak, sira balun tuda no balun halai mak monu no ida fali dehan nia trauma tanba gas air mata.
“Ida fali iha ain ne’e, gas air mata tuda mai mak kona iha nia kelen ne’ebé konsege nia kalsa mós nakles maibé kondisaun di’ak, ne’ebé sira ohin fila hotu ona. Agora, ida, ita-nia kolega ida defisiénsia ne’e mak sira-nia Organizasaun RHTO ne’e mai atu lori, ida ohin ita-boot sira haree ne’e mak sei iha ne’ebá depois ami observa. Doutóra haree karik buat hotu-hotu normál bele fila,” nia dehan.
Nia afirma, loron daruak sentru Saúde Formosa seidauk halo transferénsia ida ba HNGV, tanba sira mai ho kondisaun ne’ebé baibain, kondisaun di’ak hotu la refere ida, karik todan mak halo transferénsia.
Iha fatin hanesan, familia husi vitima Valente do Carmo Freitas deklara katak estudante ne’e tuir demostrasaun, maibe hetan tuku husi pesoál PNTL nune’e monu kedas iha fatin hafoin evakua ba Sentru Saúde Formosa hodi hetan tratamentu.
“Ha’u-nia alin ne’e eskola iha UNTL fakuldade Edukasaun Departamentu Biolojia entaun sira ba tuir demo no nia mak kaer espanduk iha oin derepente PNTL sira tiru gas air mata tama sira-nia matan depois mak oknum PNTL kaer nia faru hodi tuku iha parte oin no monu ba rai, mak sira evakua ba sentru saude Formosa hodi hetan tratamentu. Tanba ne’e, tanba ne’e hanesan família la satisfas ho atuasaun PNTL nian,” familia husi vitima João Martins ne’e hateten.
Notísia Relevante: Parlamentu aprova ho unanimidade rezolusaun ba kanselamentu sosa viatura foun
Jornalista : Felicidade Ximenes
Editór : Cancio Ximenes
