DILI, 19 Setembru 2025 (TATOLI)—Prezidente Repúblika, José Ramos-Horta, sesta ne’e, realiza Palestra Prezidensiál 2025 Série III ho tema “Empreendedorizmu: Oinsá Hahú?”, ne’ebé halibur grupu estraordináriu pioneiru internasionál sira husi área negósiu, esplorasaun, ekolojia, no lideransa umanitária hodi inspira jerasaun foun timoroan sira-ne’ebé halo mudansa.
“Palestra ne’e ho objetivu atu desmistifika prosesu oinsá hahú negósiu foun, promove valór universál sira hanesan reziliénsia no foti risku no haburas ligasaun entre timoroan sira-ne’ebé halo mudansa ho líder internasionál sira hodi kuda kolaborasaun no mentorizasaun iha future,” refere nota ne’ebé Agência Tatoli, ohin.
Programa dinámiku sira hahú ho diskursu benvindu husi Prezidente Ramos-Horta, ne’ebé enkuadra vizaun nasionál ba inovasaun. Partisipante sira hetan hanoin úniku sira husi diskursu prinsipál ida hosi Prof. Dr. Dr. h.c. mult. Frederik Paulsen, Prezidente Ferring Pharmaceuticals, ne’ebé fahe ninia reflesaun sira kona-ba empreendedorizmu, lideransa no espíritu deskoberta nian.
Tuir mai ho diskursu destakadu ida husi ambientalista brazileiru renomadu Roberto Klabin kona-ba ‘Ekolojia nu’udar Empreendedorizmu,’ ne’ebé fó sai ninia esperiénsia harii modelu negósiu bazeia ba konservasaun ne’ebé susesu.
Eventu ne’e mós aprezenta reflesaun vídeo eskluzivu kona-ba tema universál ‘Hahú husi fatin hotu-hotu’ husi grupu pioneiru oioin, inklui esploradór Britániku David Hempleman-Adams no prezervasionista amerikanu Clifton Foster.
Diskusaun prinsipál husi palestra ida-ne’e mak hanesan diskusaun painél ida-ne’ebé moderadu ho títulu tema ‘Hahú ho Korajen–Lisaun sira husi Pioneiru Globál sira’, ne’ebé aprezenta Prezidente Ramos-Horta iha konversa ho emprezáriu Ibrahim Sharaf, Christopher Mouravieff-Apostol, no Warren Amason.
Sesaun ne’e konklui ho audiénsia interativu husu no hatán, fó ba estudante sira, profisionál sira no membru sira setór privadu nian, oportunidade direta ida atu halo diálogu ho panelista sira.
“Espíritu empreendedorizmu mak espíritu Timor-Leste nian rasik: reziliente, iha rekursu no harii iha vizaun ida ba futuru ida-ne’ebé di’ak liu,” Hnota ne’e haktuir.
Palestra ida-ne’e la’ós de’it diskusaun ida; ida-ne’e hanesan bolu ida ba asaun ba foinsa’e timoroan sira, hodi aprende husi pioneiru globál sira-ne’e mak hamosu korajen atu halo inovasaun, atu foti risku sira-ne’ebé kalkuladu, no atu harii empreza sira-ne’ebé sei lori ita-nia nasaun nia prosperidade ba dékada sira tuir mai.
Eventu ne’e sai hanesan plataforma importante ida ba diálogu diretu, ne’ebé hakat liu foku negósiu tradisionál ida hodi hatudu oinsá espíritu emprezariál dudu inovasaun iha setór hotu-hotu.
Ida-ne’e fó kbiit ba partisipante sira ho susesu hodi desmistifika etapa inisiál sira lansamentu emprendimentu ida-nian no destaka valór sira-ne’ebé fahe husi reziliénsia no vizaun.
Série Palestra Prezidensiál nu’udar inisiativa prinsipál ida-ne’ebé dezeña atu estimula diskursu nasionál kona-ba asuntu krítiku ba Timor-Leste nia dezenvolvimentu, hodi lori líder pensamentu sira ne’ebé koñesidu iha mundu tomak mai Dili.
Série ne’e fornese plataforma ida ba diálogu ne’ebé inspira, fahe prátika di’ak liu iha mundu no fó kbiit ba sidadaun timoroan sira atu kontribui ba nasaun nia futuru ne’ebé prósperu.
TATOLI
