BOBONARU, 19 Setembru 2025 (TATOLI) – Ospitál Referénsia Maliana, munisípiu Bobonaru, halo ona transferénsia pasiente mane ida ho inisiál IN, idade 42, ne’ebé ho sintoma raiva, bá Ospitál Nasionál Guido Valadares (HNGV, sigla portugés) hodi hetan tratamentu intensivu.
Diretór Ezekutivu Ospitál Referénsia Maliana, José Marçal da Cruz, informa katak simu pasiente ida husi sentru saúde komunitáriu postu administrativu Bobonaru ho kazu asu tata no iha kondisaun agresiva, ta’uk naroman no bee.
“Pasiente ne’e asu tata semana tolu ona [foin lori mai ospitál] no asu ne’e, na’in baku mate tiha ona, halo observasaun hatudu sinál raiva “, nia relata.
Pasiente husi suku Lourba ne’e dezde asu tata seidauk simu vasina. “Nia kanek ne’e taka ho ai-moruk tradisionál, la vasina. Ohin mai ospitál pesoál saúde la vasina, refere de’it bá Dili, ai-moruk vasina stock iha”, nia dehan.
Tuir dadus husi Departamentu Epideomiolojia, Servisu Munisipál Saúde Bobonaru, dezde Janeiru, rejista kazu asu tata ema 300-resin, husi númeru ne’e konfirmadu joven mane ida no labarik feto ida mate tanba infetadu ho raiva.
Notísia relevante: Kampaña kontra raiva iha Bobonaru: Vítima asu tata na’in-65 simu vasina
Jornalista: Sergio da Cruz
Editora: Maria Auxiliadora
