BOBONARU, 22 Setembru 2025 (TATOLI) – Autoridade Munisípiu Bobonaru aloka $2.750.460 iha Planu Dezenvolvimentu Integradu Munisipál (PDIM) hodi implementa projetu hamutuk 22 iha tinan oin.
Diretór PDIM munisípiu Bobonaru, Rui Bere Mau Barros, konfirma katak projetu hirak ne’e aprovadu ona iha Komisaun Revizaun Orsamentu (KRO) foin lalais ne’e no hein de’it atu implementa iha tinan oin.
“Postu Administrativu Bobonaru iha projetu lima, Maliana neen, Loloto’e lima, Balibó haat, Kailaku ida no Atabae mós ida de’it”, nia informa ba jornalista sira, ohin.
Projetu ba tinan oin ne’e, tuir diretór Rui Bere, sei responde ba preokupasaun povu iha baze, tanba númeru barak liu kompara ho tinan 2025 no tinan hirak liubá.
“Ha’u hanoin ne’e prioridade povu mak rekomenda liuhusi xefe suku ne’ebé reprezenta postu mai enkontru. Sira agradese no kontente tanba bele fó benefísiu boot ba komunidade sira, kompara ho tinan kotuk ne’ebé proposta barak más aprova neen de’it”, nia haktuir.
Iha sorin seluk, xefe suku Tapo, Xavier Barreto, agradese ba Governu tanba bele prioritiza projetu konstrusaun ba postu saúde iha suku Tapo iha orsamentu 2026.
“Tenke establese duni postu saúde, tanba ha’u hanoin Tapo ne’e suku ida sentru husi suku rua Leber ho Oe-leu. Tanba ne’e mak iha tinan naruk nia laran ha’u sai xefe suku ne’ebé reprezenta postu Bobonaru rekomenda beibeik proposta ba iha enkontru Konsellu Koordenasaun Munisipál, tanba saúde ne’e importante ba komunidade, liuliu inan isin-rua no mós ita-nia inan-aman idozu sira, nune’e labele hakat tan bá sentru saúde Bobonaru ho distansía ne’ebé ke dook”, dehan.
Projetu hirak ne’e mak hanesan konstrusaun bee-moos ba sistema bomba eletrisidade iha suku Aidabaleten, postu administrativu Atabae ho valór orsamentu rihun $180, kanalizasaun bee-moos ba sistema bomba eletrisidade iha aldeia Ai-Asa, suku Leo-hitu, postu administrativu Balibó ho valór rihun $210.
Konstrusaun muru haleu edifisíu Komisaun Nasionál Eleisaun no salaun apuramentu munisipál rihun $72, konstrusaun uma ba fatin rai ai-moruk iha Balibó Villa ho totál orsamentu rihun $45, konstrusaun postu saúde iha suku Tapo ho orsamentu rihun $120, konstrusaun sala tolu iha eskola Ensinu Bazíku Filiál (EBF) Gelokaet, iha suku Ritabou, postu administrativu Maliana ho totál orsamentu rihun $72, konstrusaun bee-moos iha aldeia Lalis, suku Cowa, postu administrativu Balibó ho valór orsamentu rihun $90.
Reablitasaun sistema kanalizasaun bee-matan Bol Thama no Laho, iha suku Tapo-Memu, postu administrativu Maliana ho valór rihun $108, konstrusaun postu saúde suku Lontas, postu administrativu Loloto’e ho valór rihun $78, reablitasaun sistema bee-moos gravitasaun iha aldeia Silagolo, Dilai no Anon, iha suku Lupal ho Guda, iha postu administrativu Loloto’e ho valór rihun $180, kanalizasaun bee-moos sistema bomba eletrika iha aldeia Atubuti, Tuturema, Aitutu, iha suku Raiheu no Atudara, postu administrativu Kailaku ho valór rihun $105.
Konstrusaun irrigasaun Sordoli ho totál orsamentu rihun $270, konstrusaun merkadu postu administrativu Loloto’e ho totál $150, kontinuasaun konstrusaun merkadu Mau-Mali ho orsamentu rihun $294, konstrusaun kampu multifunsaun Balibó ho valór rihun $54, kontinuasaun konstrusaun irrigasaun Raegeren ho valór rihun $2, konstrusaun sala tolu iha EBF Ozo, suku Lontas ho valór rihun $72, reabilitasaun ba kanalizasaun bee-moos iha aldeia Oceli, suku Guda ho valór rihun 60, konstrusaun postu saúde no rezidénsia pesoál saúde iha suku Oe-leu ho valór rihun $108A.
Aleinde ne’e, konstrusaun sala tolu ba EBC Dom Kaileto no reabilitasaun sala neen iha eis-Primária Dom Kaileto multisektór ho valór rihun $150, konstrusaun sala neen iha Poeleu, suku Male-Ubu ho valór rihun $150 no ikus liu konstrusaun eskola sala tolu iha EBF Paralelu Saburai ho kustu rihun $66.
Notísia relevante: Negosiante sira husu autoridade Bobonaru rezolve kondisaun merkadu liuhusi PDIM
Jornalista: Sergio da Cruz
Editora: Maria Auxiliadora
