Deputadu António Verdial Ferreira hakotu iss tanba problema ho nanál bubu
DILI, 22 Setembru 2025 (TATOLI)—Diretór Servisu Apoiu Diagnóstiku no Terapeutiku iha HNGV, Vidal de Jesus Lopes, hateten Deputadu António Verdial Ferreira hakotu iis tanba problema ho nanál bubu.
Notísia Relevante: PN hato’o votu pezár ba falesimentu deputadu António Verdial Ferreira
Nia hatutan, matebian transfere husi Klínika Dili Medikal Center (DMC) mai Hospoitál Nasionál Guido Valadares iha loron 20 fulan-Setembru, iha tuku 10 kalan ho kondisaun ne’ebé mak grave ona, tanba sofre nanál bubu hodi dada iis araska.
“Ita-nia deputadu ne’e mate iha loron sábadu kalan, tuir istória moras ne’e katak nia baixa iha DMC durante loron tolu ona no problema iha nanál, depois kondisaun nanál ne’e mak bubu aumenta nia tamañu komesa obstrui ona dala iis susar mak foin transfere mai HNGV, maibé ita la bele salva,” Vidal de Jesus Lopes hateten ba jornalista sira iha nia kna’ar fatin HNGV, Bidau, ohin.
Nia esplika, pasiente halo transferensia mai ho kondisaun grave ona tanba nanál bubu no atu taka tomak dalan dada iis nian ne’e mak susar, nune’e doutór sira konsege halo intervensaun maibé la bele salv, tanba ninia dalan dala iis ne’e taka tomak tiha ona, dada iis la di’ak, ho nune’e kauza husi ita-nia deputadu mate tanba complit rewin intruaction, dala iis ne’e obstrui totálmente husi nanal ne’e bubu.
Nia informa, infomasaun ne’ebé mak iha Hospitál Nasionál Guido Valadares katak durante ne’e Deputadu ne’e la ba halo tratamentu iha HNGV.
“Tuir infomasaun ami asesu ita-nia deputadu la mai iha ne’e, tanba ami iha ne’e mós fó ekipa ida atendementu ba ita-nia membru Governu, inklui orgaun soberanu haat ne’e. Karik, sira-nia protokolu komunika ami, ami sempre halo atendementu ba sira,” nia relata.
Entertantu, Matebian moris iha Ainaru, iha loron 30 fulan-Maiu tinan 1968, husi aman Manuel Ferreira no inan Celestina da Silva Barros. Matebian kaben ho Sofia do Rosório Caldas, no iha oan na’in-haat. António Verdial da Silva Ferreira lisensiadu iha Administrasaun Públika iha Universidade Orientál Timor-Lorosa’e (UNITAL) iha tinan 2024.
Iha 1988-1989, reprezenta nu’udar atleta futeból no maratona husi munisípiu Ainaru no nomeadu hanesan membru prinsipál organizasaun Kmanek Oan Rai Klaran (KORK).
Partisipa mós luta rezisténsia klandestina no prosesu libertasaun nasionál Timor-Leste iha tinan 1987-1988.
Iha tinan 1999, hamutuk ho konselleiru másimu partidu KHUNTO, José dos Santos Naimori Bucar, halo mobilizasaun masa iha propaganda polítika kona-ba prosesu referendu, hanesan mós sobrevivente masakre Manutasi, Ainaru.
Matebian nu’udar mós fundadór partidu KHUNTO iha 2010 no ezerse funsaun hanesan konselleiru nasionál partidu nian.
Matebian eleitu nu’udar membru Parlamentu Nasionál iha eleisaun parlamentár 2023, asume vise-prezidente bankada parlamentár KHUNTO iha lejislatura daneen.
António Verdiál da Silva Ferreira hanesan membru deputadu iha komisaun F trata Asuntu Saúde, Seguransa Sosiál no Igualidade Jéneru.
Notísia Relevante: KHUNTO lakon deputadu António Verdial Ferreira
Jornalista : Felicidade Ximenes
Editór : Cancio Ximenes
