DILI, 22 Setembru 2025 (TATOLI)—Ministériu Edukasaun (ME) hamutuk ho Komisaun Funsaun Públika (KFP) ho Institutu Nasionál Formasaun Dosente no Profisionál (INFORDEPE), Segunda ne’e, halo abertura ba formasaun indusaun ba profesór bolsa kandidatu primeiru no segundu siklu hamutuk 187.
“Ohin halo abertura ba formasaun indusaun ba profesór foun hosi rezultadu bolsa kandidatu primeiru no segundu siklu hamutuk 187 molok husik sira ba hanorin,” Ministra Edukasaun, Dulce de Jesus Soares informa ba TATOLI iha salaun INFORDEPE, Balide, Dili.
Notísia relevante: INFORDEPE hahú fó formasaun ba profesór kolokadu iha semana oin
Ministra Dulce hatutan profesór hamutuk 187 ne’ebé sei tuir formasaun indusaun no kona-ba orden unida ne’ebé Polísia Nasionál mak sei ajuda hodi sira ba hanorin karik ho di’ak liután. Alende ne’e mós oinsá isár bandeira iha eskola, kanta Hino Nacional no kontinénsia ho loloos.
“Ida-ne’e importante ba sira atu iha esperiénsia bainhira hanorin, presiza iha étika, responsabilidade, komunikasaun. Ida-ne’e hanesan parte ida-ne’ebé integra iha kurríkulu sékulu XXI nian,” Dulce esplika.
Nune’e mós, Prezidente Komisaun Funsaun Públika, Agostinho Letêncio de Deus informa formasaun indusaun ka inisiál ne’e baze importante ba profesór atu hatene molok koloka ba eskola sira-ne’ebé presiza.
“Ohin ita hotu akompaña abertura ho Ministra Edukasaun, Dulce de Jesus Soares, hodi fó formasaun inisiál ba profesór bolsa kandidatu sira. Formasaun karakter ne’e hosi PNTL. Tanba ita la’ós haree ba pedagojia tanba profesór la’ós formadór maibé edukadór mós. Entaun, hosi formasaun inisiál ida-ne’e baze importante ba sira-nia progresaun iha futuru,” Letêncio dehan.
Aleinde ne’e, Diretór Nasionál Rekursu Umanu, João Amaral hateten tuir dadus ME koloka ona profesór 2.000-resin husi Bolsa Kandidatu ba eskola pre-eskolár no ensinu báziku iha territóriu.
“Agora provizóriu profesór sira-ne’ebé iha Bolsa Kandidatu hela 1.000-resin maibé agora ita atu koloka tan 187, entaun hela 900-resin mak sei iha bolsa nia laran,” nia katak.
Notísia relevante: 29 Setembru, Bolsa kandidatu ba grupu rekrutamentu 1° no 2° siklu EB sei simu pose
Formasaun ne’e hahú ohin no sei ramata iha Sesta (26/09). Iha 29 Setembru koloka ba eskola ne’ebé identifikada ona.
Jornalista: Osória Marques
Editór: Xisto Freitas da Piedade
