DILI, 06 dezembru 2024 (TATOLI)— Institutu Nasionál Formasaun Dosente no Profisionál Edukasaun (INFORDEPE), iha semana oin, hahú fó formasaun ba profesór foun sira ne’ebé liu vaga bolsa kandidatu no kolokadu ona ba eskola sira.
“Formasaun ne’e hahú iha semana oin, loron 9 to’o 21 dezembru, ne’ebé formasaun ne’e ita koopera ho Institutu Katóliku ba Formasaun Profesór (ICFP) Baucau hodi fó formasaun ba ita-nia manorin sira husi bolsa kandidatu ba nível 1 no nível 2,” Prezidente INFORDEPE, Domingos Martins, informa iha salaun INFORDEPE, Balide, sesta ne’e.
Notísia relevante : ME kontinua esforsu fornese ekipamentu ba formasaun profesór nian
Formasaun sei fahe ba parte rua, ne’ebé sei hahú husi munisípiu Bobonaro, Dili no Lautém, enkuantu munisípiu sira seluk sei hein etapa tuir mai.
“Ita fó formasaun fazeadamente, ne’ebé ita sei hahú uluk ho munisípiu tolu ne’e depois munisípiu seluk tuir tan. Faze daruak ne’e mós ita sei hahú iha loron 15 to’o 21 dezembru, ne’e hahú husi munisípiu Baucau Covalima no Liquiçá,” nia akresenta.
Prezidente institutu dehan, vaga bolsa kandidatu profesór ne’e nu’udár konkursu públiku, nune’e ema hotu tuir, maski durante ne’e sira la hanorin iha eskola sira.
“Fó formasaun ba profesór sira ne’ebé mak liu ona primeiru no segundu etapa, ema ne’ebé mak liu iha teste foin daudaun ne’e konserteza balun la’ós mai área edukasaun no lisensiatura iha área oin-oin de’it, ne’ebé INFORDEPE no Ministériu Edukasaun iha dever no morál atu fó formasaun ba sira,” nia katak.
Jornalista : Osória Marques
Editora : Julia Chatarina
