DILI, 22 Setembru 2025 (TATOLI)—Ekipa Na’in-Feto FC kompromete sei prepara aan di’ak liután antes kompete iha primeira divizaun hafoin hakat liu faze kualifikasaun apuramentu Liga Futébol Femininu Timor-Leste (LFFTL).
Treinadór Na’in-Feto FC, Bernardino Soares esplika preparasaun sira-ne’ebé atu halo antes kompete iha primeira divizaun mak liuhosi kontratu jogadór sénior ekipa nasionál feminina na’in-haat nune’e reforsa ekipa tanba konsideradu kompetisaun sei kompetitivu.
Bernardino relata klube halo ona kontatu ba jogadór sénior na’in-haat referidu no sei aprezenta planu ba rekrutamentu ba jestaun klube hodi deside kontratu iha tempu badak.
“Se ita la halo rekrutamentu sei ameasadu tun hikas bá segunda divizaun, tanba-ne’e ha’u sei ko’alia ho estrutura sira hodi halo rekrutamentu jogadór atu reforsa tan ekipa bainhira kompete iha primeira divizaun,” Bernardino Soares informa ba TATOLI liuhosi telefónema, Segunda ne’e.
Notísia relevante: Na’in-Feto FC hakat bá primeira divizaun LFFTL
Aleinde ne’e, preparasaun seluk husi Na’in-Feto FC sei hasa’e intensidade treinu liuliu sistema jogu, estratéjia inklui tékniku tantu individu no ekipa nune’e bele aumenta kualidade ekipa iha primeira divizaun ne’ebé tuir planu sei realiza iha finde Setembru ka inísiu Outubru.
Bernardino Soares espresa sentimentu orgullu tanba faze apuramentu jogadór sira hatudu jogu ne’ebé kompetetivu no gaña rezultadu hodi lori Na’in-Feto hakat bá primeira divizaun.
“Ami tenke book aan sedu. Kuandu tarde liu sei falla boot,” Bernardino akresenta.
Ekipa Na’in-Feto FC liuhosi apuramentu hala’o jogu haat, manán daruak no impata daruak hodi serteja hakat bá primeiru divizaun LFFTL hafoin rezultadu tabela klasifikasaun hatudu rekolla pontu ualu.
Enkuantu, São José FC rasik obrigadu tenke hakoi mehi hakat bá LFFTL bainhira rekolla pontu 0 durante faze apuramentu no VDL iha pozisaun daruak ho pontu lima no sei hela jogu ikus kontra São José ne’ebé tuir oráriu sei realiza iha kampu Lalenok, Tersa (23/09/2025).
Jornalista: Natalino Belo
Editór: Xisto Freitas da Piedade
