BOBONARU, 22 Setembru 2025 (TATOLI)-Sekretáriu Estadu Kooperativa (SEKoop), Arsénio Pereira, fó pose ba estrutura Federasaun Multi-Kooperativa (FMC, sigla portugés) Kuda Ulun Fronteira (KUF) na’in-hitu ne’ebé sei hala’o knaar ba períodu 2025-2028.
Federasaun ne’e establese atu sai mahon ba kooperativa primária sira ne’ebé eziste iha munisípiu Bobonaru hodi fortalese setór ekonomia sosiál.
Iha intervensaun, Sekretariu Estadu kongratula kooperativa primária lima ne’ebé sai pioneiru ba Federasaun Multi-Kooperativa Kuda-Ulun Fronteira no fiar katak dirijente, vogál no fiskál sira sei halibur tan membru barak atu organiza malu hodi hametin setór kooperativa iha Bobonaru, tanba munisípiu ne’e iha poténsia no jeografikamente baliza ho nasaun viziña Indonézia.
Governante ne’e dehan ezisténsia FCM-KUF atu hametin setór kooperativa nia abut iha munisípiu tanba ba futuru kooperativa sei fó kontribuisaun maka’as ba kreximentu ekonómiku, bainhira Bobonaru hakat ba podér lokál.
“Setór kooperativa ne’e sai ai-riin ba ekonomia iha rai-laran, tanba ne’e federasaun primária sira organiza malu para ita hatudu katak dezenvolvimentu ne’e ba beibeik. Ita-nia atividade, ita-nia produsaun aumenta, ita-nia rezultadu husi atividade sira ne’ebé ita halo”, Arsénio hateten iha salaun Alfándega, munisípiu Bobonaru.
Sekretariu Autoridade Bobonaru ba Asuntu Administrasaun no Finansas Domingos da Costa, prontu apoia FCM-KUF hodi dezenvolve diak liután setór ekonómiku.
“Autoridade Bobonaru asegura nafatin programa SEKoop nia, serbisu hamutuk ho kooperativa sira no foin lalais ami entrega fatin-oan ida ba kooperativa, ita sei buka fatin foun para kooperativa ne’e moris nafatin, fatin ami identifika tiha ona, hein de’it SEKoop prepara orsamentu para ami halo edifisíu foun”, nia dehan.
Prezidente emposadu FMC-KUF munisípiu Bobonaru, Helder Amaral, promete katak durante mandatu sei implementa planu no programa sira hanesan mellora no akompaña kooperativa primária ne’ebé atendimentu seidauk di’ak, kontinua no motiva kooperativa iha Bobonaru husi aldeia to’o nivel postu administrativu.
Fasilita estudu komparativu ba kooperativa primária inklui federasaun nia ba federasaun seluk iha rai-laran no iha li’ur. Aleinde ne’e investe iha setór agrikultura no área sira seluk hodi hasa’e produsaun agríkola
“Ami-nia programa mak hanesan ne’e, ami espera ita hamutuk atu hadi’ak ekonomia iha rai-laran”, dehan.
FMC-KUF harii husi kooperativa primária lima mak hanesan Kréditu Uniaun Lakon Nakukun Mosu Naronan (LANAMONA), Koperativa Kréditu Uniaun Nilda, Kooperativa Multisetorál Fini ba Futuru, Kooperativa Multisetorál HAPS no Kooperativa Multisetorál Buigari ho nia totál membru 1.802, mane 1.118 no feto 784 no iha kapitál millaun $1,6.
Notísia relevante: Grupu kooperativa MEKOFL Bobokase konsege rai fundu rihun $7-resin
Jornalista: Sergio da Cruz
Editora:Maria Auxiliadora
