OEKUSI, 18 Marsu 2025 (TATOLI) – Grupu Movimentu Kooperativa Oekusi Funu Litik (MEKOFL) inisiá iha 2022 husi agrikultór sira iha aldeia Fatubija’e, suku Bobokase, sub-rejiaun Pante Makasar Rejiaun Administrativa Espesiál Oekusi Ambeno (RAEOA), konsege rai ona fundu ka kapitál hamutuk $7.714.40.
Eduardo dos Remedios Colo, nu’udar Xefe Grupu MEKOFL, relata bainhira simu vizita ofisiál husi Sekretária Rejionál ba asuntu Agrikultura, Filomena Sila, iha edifisíu MEKOFL, tersa ne’e.
Xefe Grupu informa katak grupu kooperativa MEKOFL harii iha fulan-Setembru 2022, ne’ebé inisíativa rasik mai husi agrikultór sira ho objetivu atu hamoris ekonómia família uma-laran, tanba iha bairru laran ne’e populasaun sira maioria moris ho vida agrikultor ne’ebé hetan osan liuhusi fila liman iha merkadu.
“Ami rai osan ne’e hahú husi sentavu 0,25 to’o dollar $5 de’it kada fulan, tanba ami maioria ferik ho katuas de’it, osan sira-ne’e hetan liuhusi faan buah-malus no ai-faun sira no modo tahan, ne’ebé agora atu tama ba tinan tolu, ami-nia fundu agora iha ona $7,714.40,” nia dehan iha aldeia Fatubija’e.
Nune’e, nia reprezenta membru grupu hamutuk na’in-43, hato’o rekomendasaun tolu ba Autoridade RAEOA liuhusi Sekretária Rejionál ba Asuntu Agrikultura, atu apoia fasilita formasaun tékniku oinsa buka osan, apoia fini tantu hortikultura no animál atu sustenta nesesidade kooperativa no husu mós atu apoia orsamentu atu aumenta kapitál kooperativa nian.
Iha fatin hanesan, Sekretária Rejionál ba Asuntu Agrikultura, Filomena Sila, informa objetivu mai vizita atu motiva no halo mós diálogu ho membru sira atu hato’o preokupasaun sira tanba objetivu harii grupu ne’e atu halo mudansa ba família no grupu.
Razaun seluk, tanba molok ne’e grupu MEKOFL hato’o proposta ida ba iha Prezidente Autoridade RAEOA maibé okupadu, tan ne’e hetan despaixu ofisiál ida, atu mai rona direita membru grupu sira-nia nesesidade saida mak presiza atu apoia iha futuru.
“Ohin, ha’u rona direita husi xefe grupu no mebru sira, agradese tanba sira iha konsiénsia ho komitmentu bo’ot atu bele dezenvolve grupu ne’e ba oin, tan ne’e ha’u apela ba grupu sira nafatin iha komitmentu ho unidade fiar malu entre membru ho xefe no membru ho membru sira, nune’e grupu ne’e bele buras nafatin ba oin, saida mak sira rekomenda, ha’u presiza proposta hatama ida, tanba kada tinan iha orsamentu subvensaun públika, iha futuru ita-bele apoia,” nia dehan.
Iha biban ne’e mós, Sekretária Rejonál Agrikultura, fó hanoin ba membru grupu MEKOFL, aliénde rai osan, dezenvolve mós atividade seluk hodi kontinua haforsa fundu kapitál kooperativa nian.
“Ha’u mós rekomenda, labele haree de’it mak rai no impresta osan, maibé bele halo tan atividdae seluk kona-ba hortikultura atu kuda modo hodi sustenta kooperativa ne’e, tanba husi agrikultura rejionál prontu atu fini no abubu organiku, no mós sei apoiaatu halo kabalizasaun bee-moos maibé buat sira-ne’e presiza submete pedidu liuhusi tékniku estensionista ne’ebé destakadu ona ha suku Bobokase,” nia dehan.
Jornalista: Abílio Elo Nini
Editór: Florencio Miranda Ximenes
