DILI, 22 Setembru 2025 (TATOLI)—Primeiru-Ministru, Kay Rala Xanana Gusmão, hateten kestaun kona-ba fronteira marítima Governu Indonézia no Timor-Leste konkorda sei realiza reuniaun formál dahuluk ba negosiasaun fronteira marítima iha loron 08 to’o 10 Dezembru 2025 iha Indonézia.
Notísia Relevante: PR Horta fó konfiansa ba Xanana solusiona fronteira Naktuka
Primeiru-Ministru hato’o kestaun ne’e hafoin hala’o servisu ofisiál bá Londres (Reinu Unidu) hodi partisipa enkontru estratéjiku ho konselleiru superiór no ekipa jurídika kona-ba kestaun fronteira terreste no marítima inklui vizita traballadór timoroan sira-ne’ebé hala’o servisu iha Reinu Unidu (Inglaterra) durante semana ida hahú husi 15-21 Setembru 2025.
“Ha’u bá Londres ba hasoru ho konsilleiru ho ita-nia advogadu sira, entaun iha fulan-Agostu ne’e ekipa husi Indonézia mai to’o Timor hodi hatudu katak sira preparadu hakarak atu ko’alia ona kona-ba fronteira marítima,” Primeiru Ministru informa ba jornalista sira iha sala VIP, aeroportu Komoro, ohin.
Xefe Governu ne’e afirma, kle’ur tebe-tebes sira buka atu ko’alia uitoan kona-ba fronteira marítima maibé sira temi lei internasionál ne’ebé dehan “a terra comanda o mar” katak bainhira fronteira ida atu ba to’o tasi tenke iha ponte.
“Bainhira Prezidente Repúblika Indonézia Prabowo Subianto simu posse, ha’u ba atualiza pontu importante rua hanesan hakotu kedas ona kona-ba fronteira terrestre iha Naktuka no mós husu atu hahú halo negosiasaun kona-ba fronteira marítima,” nia dehan.
Nune’e iha momentu ne’ebá Prezidente Prabowo mós dehan loos, sira mós preparadu entaun foin daudaun iha fulan-Agostu ne’e nia haruka ona ekipa ida mai hodi ko’alia ho diskusaun ne’ebé nakloke, ho ida-ne’e mak iha kontaktu nafatin no sira propoin hahú husi 01-03 Dezembru atu realzia enkontru
Maibé tamba TL nia konsilleiru sira mós hela iha ne’ebá no sira mós la’ós reformadu ona ho asuntu barak atu defende ba parte hotu-hotu, nune’e sira deside atu muda loron ba reuniaun ida ne’e tamba iha data ne’ebé mensiona sira labele partisipa, nune’e Primeiru-Ministru mós informa kedas ba Prezidente Repúblika Indonézia nian no sira konkorda muda loron.
“Nune’e muda fali ba loron 08-10 Dezembru 2025 sei hahú ronda formál dahuluk ba negosiasaun fronteira marítima, no tuir planu sira sei realiza iha Jakarta se lae iha Bali (Indonézia) maibé iha loron,” Primeiru Ministru Xanana dehan.
“Ne’ebé asuntu ida lori ha’u ba Londres ne’e atu diskute ho ita-nia konsilleiru sira atu oinsá mak ita bele hahú negosiasaun ne’e ho Indonézia, sira mós mensiona katak iha fulan ikus tinan ne’e sei hasoru malu dala ida tan no iha tinan 2026 sei hasoru malu dala haat,” nia hateten.
Nune’e, iha biban ne’e nia husu boot ho espíritu ne’ebé nakloke bele rezolve fronteira marítima ho Indonézia no ita sente katak bele hakat to’o iha pasu ne’ebá tamba Prezidente Prabowo rasik mak haruka nia ekipa sira mai Timor.
Enkauntu, antes ne’e, TL halo negosiasaun ho Governu Austrália TL konsege la’o tuir dalan ne’ebé mundu nunka haree no konsiderasaun kompursória ne’e la’ós TL mak matenek maibé TL nia maluk sira maka ajuda ho esperénsia maka’as husi TL nia advogadu sira, tanba sira mós rezolve problema iha Amérika, Pásifiku, Áfrika.
Notísia Relevante: Xanana sei hasoru Prabowo aborda fronteira Naktuka tuir akordu Olanda no Portugál
Jornalista : Alexandra da Costa
Editór : Cancio Ximenes
