OEKUSI, 23 Setembru 2025 (TATOLI) – Autoridade Inspesaun no Fiskalizasaun Atividade Ekonomia Sanitária no Alimentár, Institutu Públiku (AIFAESA,I.P), segunda ne’e, hala’o inspesaun ba estabelesimentu produsaun bee-galaun ka galong unidade tolu iha suku Costa sub-rejiaun Pante Makasar Rejiaun Administrativa Espesiál Oekusi Ambeno (RAEOA).
Estabelesimentu produsaun bee-galaun unidade tolu ne’e mak hanesan produsaun bee-galaun iha bairru Oésono prodús husi empreza Bobometo Unipesoál Lda no estabelesimentu produsaun bee-galaun Sopa Qua no estabelesimentu produsaun bee-galaun Naitake ne’ebé lokaliza iha bairru Numbei.
Notísia relevante:AIFAESA apela ba restaurante iha Oekusi kumpre rekizitu hodi garante ijiene
Diretora Operasaun AIFAESA, Claudina Soares Pinto, esplika katak, atividade ne’e konjunta ne’e, hanesan kontinuasaun husi atividade divulgasaun informasaun, bainhira deteta iha estabelesimentu sira-ne’ebé la ijiene, parte AIFAESA sei fó sansaun, maibé faze dahuluk husik hela rekomendasaun atu kumpre.
“Rekomendasaun lubun ida, atu tau konsiderasaun ba fatin produsaun nian, presiza garantia nia ijiene, no presiza mós haree fila-fali kona-ba nia kondisaun husi fatin referida, liuliu plafon, didin, simenti, buat sira-ne’e, tuir ita-nia kritéria báziku tanba ita utiliza fixa indústria hodi halo inspesaun ba fatin sira-ne’e,” nia hateten hafoin halo inspesaun no fiskalizasaun iha estabelesimentu produsaun bee-galaun iha bairru Numbei, ohin.
Ezekutiva ne’e espera katak, estabelesimentu sira, presiza muda no hadi’a, tanba iha futuru ekipa destakadu iha Oekusi sei halo re-inpesaun fila-fali, fokuliu ba kondisaun ijiene.
“Ohin ita halo verifikasaun kondisaun balun presiza tebes atu tau konsiderasaun husi na’in ba estabelesimentu referida, atu toma konsiderasaun hodi bele hadi’a, ami epsera iha tuirmai, ekipa destakadu, sei halo monitorizasaun fila-fali, atu garantia karak sira kumpre ona rekomendasaun ne’ebé AIFAESA propoin,” nia apela.
Tékniku produsaun bee, husi kompañia Bobometo Unipesoál Lda, José António Martins Pereira, promete sei kumpre desizaun ne’ebé AIFAESA propoin, tanba bee tenki ijiene ba ema hotu nia saúde.
“Ohin sira mai identifika fatin no lala’o serbisu, ida-ne’e di’ak tebes ba ami kompañia atu hadi’a, ne’ebé ba ha’u, fó obrigadu tanba sira mai hase ami atu regula, rekomendasaun ohin ami simu mak, tenki hadi’a sistema bee, fatin produsaun no hadi’a uma, ne’ebé ami promete sei kumpre, tanba bee importante ba ita-nia saúde ba ema hotu atu konusmu,” nia realsa.
Notísia relevante:Autoridade RAEOA-AIFAESA selebra protokolu kooperasaun ho pontu importante haat
Entretantu, atividade inspesaun ne’e, ho ekipa konjunta komposta husi serbisu saúde rejionál, Inspesaun Traballu SEFOPE, SERVE, I.P inklui mós Polísia Nasionál Timor-Leste (PNTL) ho serbisu migrasaun.
Notísia relevante:RAEOA-AIFAESA diskute futura kooperasaun ba atividade inspesaun
Jornalista: Abílio Elo Nini
Editór: Rafael Ximenes de A. Belo
