DILI, 23 Setembru 2025 (TATOLI)–Primeiru-Ministru (PM), Kay Rala Xanana Gusmão fó felisitasaun ba Polísia Nasionál Timor-Leste (PNTL) nia atuasaun ba manifestasaun ne’ebé organiza husi Estudante Universitáriu Timor-Leste (EUTL) durante loron-tolu (15-17 Setembru 2025).
Xefe Governu akompaña membru Polísia sira-nia atuasaun iha terrenu di’ak, nune’e husu atu kontinua hatudu serbisu di’ak hodi serví povu no garante estabilidade.
“Felisita ofisiais Polísia tanba hatán ba iha problema foin daudaun iha manifestasoes protestus. La ko’alia ba buat seluk, ko’alia de’it kona-ba haree ba komportamentu Polísia nian durante manifestasoes sira ne’e. Apresia no husu dehan hametin sentidu Polísia nian ba estabilidade nasionál,” PM Xanana hateten ba Jornalista sira hafoin enkontru ho Komandante Jerál PNTL ho nia ofisiál superiór sira iha Kuartel Jenerál Kaikoli, Tersa ne’e.
Notísia relevante : Komandu PNTL halo enkontru koordenasaun ho portavós manifestante na’in-10
Enkontru ne’e ko’alia mós kona-ba membru Polísia sira-nia papél iha ámbitu manifestasaun.
“Ami ko’alia kona-ba demokrásia, ne’ebé la’ós atu tuda malu, sira la’ós atu tolok malu, ne’ebé ko’alia ho sira kona-ba papél Polísia nian ba estabilidade Estadu direitu demokrátiku nian,” nia akresenta.
Xefe Governu fó hanoin mós kona-ba Komandu PNTL atu fó seguransa másima durante Primeiru-Ministru Malázia, Anwar Ibrahim nia vizita mai Timor-Leste durante loron-rua (23-24 Setembru).
Aleinde ne’e, PM Xanana husu ba membru Polísia sira atu garante seguransa durante selebrasaun loron Proklamasaun Independénsia ba dala-50 (28 Novembru 1975)
Biban ne’e, Xefe Governu husu ba membru Polísia sira atu kontinua mantein serbisu ho profisionál hodi garante nafatin estabilidade tanba iha fulan-Outubru bainhira Timor-Leste tama ona ba Asosisaun Nasaun Sudeste Aziátiku (ASEAN, sigla portugés) sei iha na’i-ulun husi nasaun seluk mak sei vizita Timor-Leste.
“Ami ko’alia oituan kona-ba komportamentu Polísia hodi hametin sentidu Polísia nian ba estabilidade nasionál,” nia katak.
Iha fatin hanesan, Ministru Interiór, Francisco da Costa Guterres hateten, prezensa PM mai Komandu Jerál PNTL ne’e tanba haree ba situasaun iha loron hirak liubá.
“Kontinuasaun fó motivasaun ba Polísia sira atu serbisu tuir regra no tuir regulamentu internál Polísia nian ne’ebé iha atu defende Estadu. Tanba ne’e, Pimeiru-Ministru mai atu enkoraja ba Polísia katak imi-nia dever mak ne’e atu defende povu no nasaun,” governante ne’e reforsa.
Jornalista : Natalino Costa
Editora : Julia Chatarina
