DILI, 16 Setembru 2025 (TATOLI)—Komandu Polísia Nasionál Timor-Leste (PNTL) halo enkontru koordenasaun ho portavós manifestante na’in-10 hodi garante pás no estabilidade durante asaun sira.
Komandante Jerál PNTL, Komisáriu Jerál Polísia Henrique da Costa husu ba Portavós husi Estudante Universitáriu Timor-Leste (UETL) ne’ebé inisia asaun pasífika atu kontrola-an no labele halo anarkizmu, katak asaun hotu tenke la’o ho pasífiku nune’e bele hetan solusaun.
“Prezensa Polísia ninian la’ós asegura Estadu, maibé asegura alin sira hotu hodi hato’o alin sira-nia aspirasaun tuir dalan,” Komisáriu Henrique hateten iha nia intervensaun bainhira konvoka enkontru reprezentante sira, iha Kuartel Jerál PNTL, Kaikoli, Tersa ne’e.
Nia dehan, Polísia hakarak asaun manifestasaun bele la’o di’ak no tuir duni manifestante sira-nia hakarak.
“Ami hakarak atu imi organiza malu ho di’ak, imi-nia intensaun hato’o ne’e ba loos, ita lakohi terseira pesoál ka ema ne’ebé mak laiha intensaun di’ak bele envolve. Nune’e, ita hotu bele kontribui ba susesu ezijénsia ita-boot sira-nian,” nia akresenta.
Notísia relevante : Falur husu labele sunu no harahun propriedade Estadu
Komandante Jerál husu ba Portavós UETL atu labele hafoer fali estudante universitáriu sira-nia naran.
“Ba oin ita mós iha komunikasaun ne’ebé di’ak, imi mós rona ami, ami mós hakarak hato’o ami-nia aspirasaun sira ne’e ho seguru no di’ak atu nune’e ami bele proteje imi ho di’ak,” nia katak.
Komisáriu Jerál ne’e nota katak mosu anarkizmu ne’e la’ós inisia husi manifestante sira maibé husi parte seluk ne’ebé dalaruma aproveita hodi konvida fali Polísia foti asaun.
“Bainhira terseira pesoa tama ka ema ne’ebé imi la kontrola tama iha ne’ebá (manifestasaun), maka imi ko’alia la rona ona. Ami husu atu nune’e orsida Komandante sira ne’e fó hanoin ba mós ita hamutuk ba atu nune’e ezijénsia sira ne’e ba duni ema ida ne’ebé loos,” nia katak.
Iha fatin hanesan, Portavós UETL, Natalizio Nunes Martins rekoñese, manifestasaun iha loron daruak ne’e mosu anarkizmu entre manifestante no autoridade seguransa nune’e mosu deskontroladu.
Nia esplika, asaun ne’e mosu tanba iha mós komunikasaun entre manifestante no autoridade seguransa tanba manifestante sira hakarak asaun manifestasaun halo nafatin iha resintu Universidade Nasionál Timor-Leste (UNTL) tanba universidade públiku ne’e iha nia autonomia, maibé Komandu Operasaun Nasionál PNTL la hatán no hakarak muda estudante ba Liseu nian, entaun iha dezentendintu hodi rezulta anarkizmu no manifestante sira deskontroladu.
“Manifestasaun aban nian, Kuarta (17/09) ami kontinua iha resintu UNTL no ami sei garante manifestante sira sei la halo anarkizmu,” nia katak.
Notísia relevante : PNTL: Halo asaun pasífika tenke kumpre Lei Liberdade ba Reuniaun no Manifestasaun
Natalizio Nunes dehan, kuandu iha terseira pesoa tama ba manifestasaun hodi halo asaun arbiru maka hanesan portavós sei identifika hodi hasai.
“Kaundu ema ruma mak deskonfia terseira pesoa tama atu baralla situasaun, maka ami sei hasai hodi husu Polísia halo identifikasaun ba nia,” estudante universitáriu ne’e hato’o.
Jornalista : Natalino Costa
Editora : Julia Chatarina
