Ramos-Horta: Vizita PM Anwar nu’udar prova amizade

DILI, 23 Setembru 2025 (TATOLI) – Prezidente Repúblika José Ramos-Horta hateten, vizita ofisiál Primeiru-Ministru Malázia Dato’ Seri Anwar Ibrahim mai Timor-Leste nudar prova ida ba amizade ne’ebé kle’an no metin entre nasaun rua.

“Amizade ida-ne’ebé harii iha solidaridade no hametin liuhusi ita-nia kompromisu komún ba demokrasia, justisa, no pás,” Ramos-Horta hateten bainhira termina enkontru ho Primeiru-Ministru Anwar iha Palásiu Prezidensiál Prezidente Nicolau Lobato Dili, tersa ne’e.

Nia dehan, Malázia hamutuk ho Timor-Leste durante momentu krítiku sira iha istória, no apoiu metin ida-ne’e mak buat ida-ne’ebé povu Timor-Leste, nunka haluha.

“Ami-nia diskusaun ohin la’o ho di’ak, konstrutivu, no foka ba futuru. Hanesan ita prepara-an ba ita-nia adezaun istórika ba ASEAN iha Outubru oinmai iha Kuala Lumpur, Malázia nia parseria importante tebes,” Horta dehan.

Xefe Estadu ne’e dehan tan, “Ami komprometidu atu serbisu besik liután ho Malázia no membru ASEAN sira hotu atu kumpre kritériu sira ne’ebé sei falta iha ami-nia dalan atu sai membru plenu”.

“Ami mós konkorda atu hametin liután ita-nia kooperasaun bilaterál ba ita-nia povu rua nia benefísiu. Ami sei enkoraja investimentu boot liután husi Malázia iha ami-nia setór xave sira hanesan agro-negósiu, turizmu, no enerjia renovável. Ami sei habarak liután oportunidade ba ami-nia foin-sa’e sira liuhusi edukasaun no formasaun vokasionál iha Malázia. No, ami sei serbisu atu hadi’a konektividade entre ita-nia nasaun rua, hodi fasilita viajen no komérsiu,” Ramos-Horta hateten.

Líder timoroan ne’e subliña, hakarak tebes atu rona iha loron aban Primeiru-Ministru Anwar nia hanoin, matenek bainhira hato’o iha palestra ba Timor-Leste iha Séri Palestra Prezidensiál 2025 ba dala-IV ho tema “ASEAN no Papél Timor-Leste nian.”

Notísia relevante:PR Ramos-Horta sei kondekora Anwar Ibrahim ho medalla ‘Grande Colar’

Jornalista: Hortencio Sanchez

Editór: Rafael Ximenes de A. Belo