OEKUSI, 24 Setembru 2025 (TATOLI) – Autoridade Inspesaun no Fiskalizasaun Atividade Ekonomia Sanitária no Alimentár, Institutu Públiku (AIFAESA,I.P), liderada husi Diretora Operasaun AIFAESA, Claudina Soares Pinto, hamutuk ho ekipa konjunta, hala’o inspesaun ba estabelesimentu fatin produsaun tempe-tahu iha fatin haat, ne’ebé lokaliza iha suku Costa sub-rejiaun Pante Makasar Rejiaun Administrativa Espesiál Oekusi Ambeno (RAEOA).
Notísia relevante:AIFAESA espera estabelesimentu produsaun bee-galaun tolu iha Oekusi garante ijiene
Estabelesimentu fatin produsaun tempe-tahu iha fatin haat, ne’ebé AIFAESA halo inspesaun mak ida iha bairru Palaban no tolu iha bairru, ne’ebé deteta maioria fatin produsaun ladun ijiene no dignu. Tanba ne’e, ekipa AIFESA, I.P rekomenda ba na’in estabelesimentu produsaun tenke kumpre.
“Atividade inspesaun ne’e ita fokuliu ba iha setór industria sira, hanesan produsaun tempe-tahu, husi AIFAESA ami haree liu ba kompeténsia ne’ebé iha, mak verifika kona-ba lisensamentu, haree ba kondisaun, estabelesimentu referidu, maibé ohin ita halo inspesaun barak mak laiha ijiene ba fatin,” nia dehan ba jornalista sira iha merkadu Numbei.
Tuir nia, ba iha produsaun tempu-tahu, ita nafatin rekomenda, konforme sira-nia kondisaun, ezemplu iha fatin balun tama ona iha planu Governu atu halo despezu administrativu atu muda ba fatin seluk, entaun ita rekomenda ba oin presiza muda ona estabelesimentu ne’e ba fatin seluk, maibé kumpre nafatin regra báziku sira, ne’ebé hatuur ona konforme fixa ne’ebé daudaun ekipa tékniku sira halo hela avaliasaun no rekomendasaun ba sira.
“Ita-nia fixa ne’ebé ita uza ba iha setór industria sira, ita haree husi kondisaun ein-jerál, depois ita haree mós kondisaun husi fatin produsaun ne’e rasik, kondisaun sira-ne’ebé mak ita ejize ba sira katak, atu haree kondisaun, oinsá preparasaun ba materiál sira, depois sasán sira-ne’ebé tau iha fatin dignu, didin-lolon, plafón sira inklui ekipamentu ne’ebé utiliza ba produsaun tempe-tahu tenke moos, ne’ebé ohin ita identifika no rekomenda presiza halo mudansa, tanba ba oin ami sei mai atu haree, atu kumpre regra báziku sira, nune’e sira kontinua atividade, sei la kumpre ita sei taka,” nia fó hanoin.
Domingos Neno, nu’udar na’in ba produsaun tempe-tahu iha bairru Palaban, rekoñese estabelesimentu fatin produsaun ladún dignu, nune’e nia promete sei hadi’a iha futuru.
“Ha’u agradese ba ekipa konjunta mai halo inspesaun mai ha’u-nian dalarua ona maibé antes ne’e iha ami enfrenta problema ida, tan ne’e ha’u-nian seidauk kumpre regra AIFAESA nian, maibé ohin sira fó ona kritéria balun atu kumpre, ne’ebé ha’u sei kumpre,”nia informa.
Nia informa, rekomendasaun ne’ebé AIFAESA propoin mak, fatin produsaun la ijiene, tanba fatin ne’e mak prinsipál tenke moos no seguru tanba ne’e hahán, daruak mak plafon sira, terseira mak ekipamentu no fasilidade sira-ne’ebé utiliza tenke garantia ijiene nafatin.
“Ne’ebé, ha’u sei kumpre, tanba ne’e ha’u-nia atividade buka osan atu moris, semak lakohi kumpre, entaun Governu liuhusi AIFAESA otomatikamente sei taka. Maibé, ba ha’u sei kumpre, kuandu la kumpre, entaun ha’u buka uza saida, ne’ebé ita tenke hakruuk regras no lei sira atu la’o tuir,” nia promete.
Notísia relevante:Autoridade RAEOA-AIFAESA selebra protokolu kooperasaun ho pontu importante haat
Entretantu, atividade inspesaun ne’e, ho ekipa konjunta komposta husi serbisu saúde rejionál, Inspesaun Traballu SEFOPE, SERVE, I.P inklui mós Polísia Nasionál Timor-Leste (PNTL) ho serbisu migrasaun.
Jornalista: Abílio Elo Nini
Editór: Rafael Ximenes de A. Belo
