Departamentu Kuidadu Paliativu husi HNGV sei muda ba Lahane
DILI, 24 Setembru 2025 (TATOLI) — Departamentu Kuidadu Paliativu husi Ospitál Nasionál Guido Valadares (HNG, sigla portugés) sei muda ho fazeadamente ba Ospitál Dr. António de Carvalho, Lahane, hodi halo tratamentu ba pasiente hirak-ne’ebé sofre moras pulmaun no tuberkuloze.
Diretór Servisu Apoiu Diagnóstika no Terapéutika HNGV, Vidal Lopes, fó-sai katak, tempu badak muda pasiente husi departamentu kuidadu paliativu ba halo tratamentu iha Ospitál Dr. António de Carvalho Lahane, Dili.
Nia fó-sai katak, tentativa dahuluk muda uluk unidade paliativu, tuir mak departamentu moras hadaet ka izolamentu.
“Signifika pasiente sira-ne’ebé mak problema pulmaun no tuberkuloze sira-ne’e ita muda hotu ba Lahane, hodi halo tratamentu iha-ne’eba, tanba ne’e ita sei muda fazeadamente,” Vidal Lopes, ko’alia iha HNGV, kuarta ne’e.
“Ita muda ona unidade sira-ne’e ba Lahane ho fazeadamente, tanba ne’e relasiona ho ema-nia moris, tenke kria uluk kondisaun mak muda ba, entaun preparasaun sira-ne’e preparadu ona, hein foti desizaun, semana oin ka fulan oin ita bele muda ona,” nia informa.
Desizaun ne’e sei foti tanba parte HNGV halo ona enkontru jerál iha semana kotuk, hamutuk ho Diresaun Nasionál Ospitalár husi Ministériu Saúde nian no parte relevante sira, katak sei muda uluk mak pasiente sira ho kategória kuidadu paliativu, tanba iha ospitál Lahane atu instala ba sentru kuidadu paliativu nian.
Diretór Vidal Lopes argumenta, razaun transfere pasiente ho fazeadamente ba Lahane tanba kestaun espasu iha HNGV, tanba númeru populasaun no partu aumenta, númeru transferénsia aumenta.
Nune’e mós oras ne’e kontrusaun pediátria andár lima sei inaugura iha dezembru no nia espera katak buat hotu la’o-tuir nia tempu atu responde ba situasaun overload ne’ebé mak loron ba loron aumenta.
Notísia relevante : https://tatoli.tl/2024/07/29/formasaun-ba-profisional-saude-27-ba-tratamentu-kuidadu-paliativu/
Jornalista : Felicidade Ximenes
Editór : Evaristo Soares Martins
