DILI, 24 Setembru 2025 (TATOLI) – Institutu Kualidade Timor-Leste, (IQTL, sigla portugés) kansela sosa mákina (ekipamentu) item tolu ba teste kualidade produtu mina-nuu, kafé no bee-moos.
Vogál II husi IQTL, Gustavo de Oliveira Maia, hateten prosesu atu halo akizisaun ba mákina sira ne’e nia konkursu públiku halo ona iha tinan kotuk no iha ona empreza manán-na’in Seroça Unipessoal Lda mak atu sosa.
“Maibé tinan ne’e ita kansela fali, tanba kompañia manán-na’in laiha kapasidade atu sosa ekipamentu sira ne’e husi rai-li’ur, ne’ebé osan ita prevee fali ba tinan oin”, Gustavo de Oliveira informa ba Tatoli, ohin.
Nia salienta katak mákina tolu ne’e presiza tebes atu sosa, tanba daudaun ne’e setór privadu sira atu esporta produtu lokál ruma, tenke lori amostra bá rai-li’ur hodi halo teste hafoin bele haruka.
“Ita sosa uluk mákina item tolu ne’e tanba prioridade liu no bazeia ba ita-nia pedidu husi setór privadu sira atu teste ba sira-nia produtu durante halo esportasaun, liuliu kafé, mina-nuu no bee”, Gustavo Maia dehan.
Lembra katak tinan kotuk IQTL prevee rihun $90 atu sosa ekipamentu ba teste kualidade produtu lokál sira.
Notisía relevante: IQTL prevee rihun $90 ba akizisaun ekipamentu teste ba produtu sira
Jornalista: Arminda Fonseca
Editora: Maria Auxiliadora
