DILI, 24 Setembru 2025 (TATOLI)—Ekipa Selesaun Nasionál Futsál Timor-Leste iha ona odamata eliminasaun husi kualifikasaun faze Grupu F Asian Football Confederation (AFC-sigla ingleza) Futsál Asian Cup tinan 2026.
Mezmu elementu Ferdinand ne’e sei falta jogu ikus kontra Palestina maibé rezultadu husi jogu referida sei la salva Timor-Leste nia mehi atu hakat kontinua ba faze kompetisaun AFC Futsál Asian Cup tinan-2026 ne’ebé sei realiza iha Indonézia.
Ekipa Lafaek obrigadu retira husi kompetisaun referida hafoin rezultadu jogu iha Grupu F derrota dala rua bainhira kontra Kirzikistaun 9-1 no Uzbekistaun 1-7 ne’ebé lori Timor-Leste okupa iha zona mean ho pontu 0.
Notísia relevante: Selesaun Nasionál Futsál derrota ho Uzbekistaun
Tuir tabela klasifikasaun Grupu F, Selesaun Nasionál Kirzikistaun mak lidera ho totál pontu neen (6), rezultadu manán dala rua bainhira kontra Timor-Leste 9-1 no Palestina 1-2, tuir kedas Uzbekistaun ho pontu neen (6), rezultadu manán dala rua kontra Palestina ho skor 7-1 no Timor-Leste 1-7.
Enkuantu, jogu ikus Palestina kontra Timor-Leste sei la muda destinu ekipa rua, iha-ne’ebé Palestina okupa iha terseira tabela klasifikasaun ho pontu 0, rezultadu derrota dala rua no Timor-Leste iha pozisaun dahaat ho pontu 0, rezultadu derrota dala rua.
Kompetisaun AFC Futsál Asian Cup 2026 sei iha faze kualifikasaun, kompete husi nasaun hamutuk 31, fahé ba grupu A to’o H no Timor-Leste rasik kolokadu iha Grupu F hamutuk ho nasaun tolu seluk hanesan Kizikistaun nu’udár uma-na’in, Uzbekistaun no Palestina.
Jornalista: Natalino Belo
Editór: Xisto Freitas da Piedade
