Timor-Leste hurlele Palestina 5-4 iha jogu ikus faze kualifikasaun AFC Futsál Asian Cup
DILI, 25 Setembru 2025 (TATOLI)—Ekipa Selesaun Nasionál Futsál Timor-Leste hurlele Palestina 5-4 iha jogu ikus faze kualifikasaun Grupu F Asian Football Confederation (AFC-sigla ingleza) Futsál Asian Cup, iha Kuarta kalan ne’e.
Mezmu ekipa rua ne’ebé kontra malu ne’e eleminadu husi kompetisaun AFC Futsál Asian Cup 2026 maibé jogu ikus faze kualifikasaun grupu F, Timor-Leste no Palestina hatudu jogu ne’ebé atrativu no tabela skor ikus hatudu selesaun Lafaek gaña vitória ho skor 5-4.
Iha jogu primeira parte, Palestina lidera uluk golu liuhosi jogadór Adnan Salloum iha minutu ualu (8) no liu minutu ida (1) Timor-Leste halo tabela skor hanesan 1-1 liuhosi Natalício iha minutu sia (9).
Notísia relevante: Selesaun Nasionál TL iha odamatan eliminasaun husi faze kualifikasaun AFC Futsál Asian Cup
Golu Natalício halo elementu Ferdinand hasa’e liután espíritu iha-ne’ebé rezulta Timor-Leste lidera hikas iha minutu 16 liuhosi Evinho Guterres prodús golu iha área penalidade. Maski nune’e, selesaun Palestina la nonook, iha-ne’ebé Ahmed Mohammed hodi rezulta golu no hakotu primeira parte ho skor impata 2-2.
Ekipa Palestina lidera hikas 2-3 iha segunda parte bainhira jogadór Adnan Salloum enxe golu hafoin simu pasajen husi Mohammed, maski nune’e Timor-Leste hasa’e liután ritmu jogu hodi rezulta tabela skor impata 3-3 bainhira Joao Paul de Sousa prodús golu iha minutu 22.
Entretantu, jogadór Ibrahim Saor konsege lori Palestina lidera hikas 3-4 bainhira aproveita situasaun livre hafoin maioria jogadór Timor-Leste abandona grandeia, maibé iha minutu ikus antes jogu ramata, espíritu patriotizmu husi ekipa Timor-Leste hatudu iha jogu referidu bainhira Evinho Guterres konsege enxe golu 4-4 iha minutu 31 no ikus mai Eufrasio Soares lori Vitória 5-4 iha minutu 33.
Jogu referidu eleva pozisaun Timor-Leste iha tabela klasifikasaun datoluk ho pontu tolu (3), rezultadu manán 1, derrota 2. Enkuantu, Palestina iha pozisaun dahaat ho pontu 0, rezultadu derrota dala tolu.
Ekipa Kirzikistaun no Uzbekistaun mak reprezenta Grupu F hakat bá kompetisaun AFC Futsál Asian Cup 2026 hafoin Kirzikistaun rekolla pontu sia (9), rezultadu manán dala tolu no Uzbekistaun pontu neen (6), rezultadu manán dala rua (2) no derrota ida (1).
Jornalista: Natalino Belo
Editór: Xisto Freitas da Piedade
