Ministra Finansa klarifika transferénsia doasaun tarde ba inundasaun Bali
DILI, 25 Setembru 2025 (TATOLI)–Governu liuhusi Ministra Finansa, Santina José Rodrigues Viegas Cardoso informa, Governu Timor-Leste seidauk bele halo transferénsia doasaun ba Provínsia Bali, tanba Governu Sentrál Indonézia seidauk entrega konta bankária ofisiál ba Miniatériu Negósiu Estranjeiru no Kooperasaun (MNEK).
Governu liuhusi reuniaun Konsellu Ministru, iha Sesta (12/09) aprova rezolusaun ida ne’ebé aprezenta husi Primeiru-Ministru, Kay Rala Xanana Gusmão, hodi atribibui doasaun ho montante millaun $2,5 (RP42.000.000.000) ba Autoridade Provínsia Bali, relasiona ho inundasaun ne’ebé akontese iha loron 09 no 10 Setembru 2025.
“Osan ne’ebé sai husi kofre Estadu ne’e iha nia mekanizmu, banhira Konsellu Ministru halo rezolusaun ida atu fó doasaun ba inundasaun ka dezastre ne’ebé akontese iha Bali,” Ministra informa ba Jornalista sira, iha Palásiu Governu, Kinta ne’e.
Notísia relevante : Timor-Leste fó doasaun millaun $2,5 ba inundasaun iha Bali
Governante ne’e dehan, MNEK tenke konfirma ba Embaixada Indonézia no Governu Indonézia atu fó konta bankária ofisiál mai Ministériu Finansa.
“Nune’e Ministériu Finansa bele halo ona tranferénsia ba sira-nia konta bankária. Maibé to’o agora ita seidauk halo tanba sei hein hela konta bankária ofisiál husi Indonézia. Bainhira Governu Indonézia la fó konta bankária ofisiál mai, normalmente ita labele halo tranferénsia tamba osan Estadu labele fó diretamente (cash),” nia akresenta.
Iha sorin seluk, Vise-Ministru Asuntu Parlamentár, Adérito Hugo dehan, nasaun ida atu atribui doasaun ba nasaun seluk ne’e iha ninia regra, maski iha kompromisu solidariedade Governu nian.
“Ein termu prosesu implementasaun ne’e tenke tuir rekezitu hanesan haruka ba husi ne’ebé no haruka ba sé, tamba ne’e la’ós transasaun baibain iha merkadu, regra tranferénsia orsamentu ho montante hanesan ne’e mós la’ós fásil, liuliu parte ida atu simu ne’e tenke fó sira-nia konta bankária mai Governu Timor-Leste,” Vise-Ministru ne’e informa.
Antes ne’e, Governadór Lokál Bali, Wayan Koster hateten, Governu Lokál seidauk simu doasaun husi Timor-Leste.
“Ha’u seidauk (simu) tanba ne’e relasiona ho nasaun, Timor-Leste hanesan nasaun ida, labele direitamente bá Governu Lokál,” nia hato’o hanesan sita husi Antaranews.
Nia hatutan, karik doasaun ne’e iha, presiza halo koordenasaun ho Governu Sentrál, la’ós Governu Lokál.
“Ne’e tenke entre nasaun ho nasaun, presiza koordena ho Ministériu Negósiu Estranjeiru,” Wayan Koster katak.
Jornalista : Alexandra da Costa
Editora : Julia Chatarina
