KOVALIMA, 25 Setembru 2025 (TATOLI)-Ministériu Juventude, Desportu, Arte no Kultura (MJDAK),liuhusi reprezentante Diretór Jerál, Egas Feritas de Araujo, aprezenta modalidade desportiva neen ne’ebé atu harame festivál fronteira 2025 iha munisípiu Kovalima.
Modalidade desportivu ne’ebé sei kompete no harame iha festivál fronteira 2025 maka futeból mane, futsál feto, basketbáll mane, voleiból, atletizmu kilometru 7 no ba mane kilometru 10 no kurrida kuda klase B no C.
“Atu hala’o atividade desportu ne’e, ami transfere ona orsamentu ba konta bankária husi Sentru Juventude munisípiu Kovalima hamutuk rihun $99,14, nune’e bainhira atu hala’o atividade deportu bele halo ona lavantamentu”, Reprezentante Diretór Jerál (MJDAK), Egas Feritas de Araujo, aprezenta iha salaun AMC.
Ekipa sira ne’ebé atu kompete mai husi munisípiu Bobonaru, Kovalima no Oekusi no kompetisaun kurida kuda entre Kovalima oan.
Atividade kompetisaun desportiva entre munisípiu ne’e iha mós kontijente ne’ebé kada munisípiu hamutuk ema na’in-68, kompostu husi xefe misaun na’in-ida, Vise na’in-ida, no xefe delegasaun na’in-ida, sekretáriu na’in-ida,mídia na’in-rua, saúde na’in-rua, treinadór na’in-lima, ofisiál treinadór na’in-lima, Futebol na’in-18, futsal na’in-uala, basket 10,volly 10 no atletizmu na’in-haat
Tuir Planu kompetisaun desportu ho modalidade neen ne’e kompete entre munisípiu Bobonaro ,Kovalima no Oekuse ne’e, sei hahú abertura iha loron 6 Outobru to’o loron 11 Outobru ne’e.
Notisia relevante: Outubru, MJDAK sei realiza festivál kulturál iha Kovalima
Jornalsta: Celestina Teles
Editór :Florencio Miranda Ximenes
