DILI, 25 Setembru 2025 (TATOLI)–Ekipa Selesaun Nasionál Futeból Timor-Leste sei dezkola ba Darwin-Austrália iha loron-30 Setembru tinan ne’e hodi halo preparasaun antes jogu AFC Asian Cup faze kualifikasaun Grupu A kontra Filipina.
Treinadór Prinsipál Selesaun Nasionál Futeból Timor-Leste, José Pedro Alves Salazar “Zé Pedro” esplika planu dezlokasaun referida sei fahe ba etapa rua.
Zé Pedro relata jogadór hamutuk na’in-22 mak sei dezloka uluk iha loron-30 Setembru no na’in-12 sei bá etapa segunda tanba jogadór hirak-ne’e atualmente sei tuir kompetisaun liga iha rai-li’ur.
“Ami hakarak serbisu ho másimu antes hala’o jogu kontra Filipina iha fulan-Outubru,” Zé Pedro hateten iha Edifísiu Federasaun Futeból Timor-Leste (FFTL), Bairros dos Grilos, Kinta ne’e.
Notísia relevante: Treinadór Zé Pedro anúnsia lista jogadór selesaun nasionál na’in-32
Zé Pedro haktuir bainhira asume responsabilidade nu’udár treinadór prinsipál iha loron-09 Agostu, nia parte hala’o kedas treinamentu ba jogadór sira iha inísiu fulan-Setembru ho objetivu atu koñese besik liután jogadór no halo preparasaun ba jogu Kualifikasaun AFC Asian Cup kontra Filipina no Tazaskistaun inklui Maladewa.
“Hau iha ambisaun no hakarak oferese rezultadu pozitivu ba ekipa nasionál,” Zé Pedro otimista.
Nia hatutan jogadór na’in-32 mak treinu no parte ekipa treinadór halo eliminasaun ba jogadór na’in-sia no deside jogadór 23 nu’udár ekipa selesaun nasionál hodi kontra Filipina iha fulan-Outubru.
Ekipa Lafaek iha faze kualifikasaun AFC Asian Cup kolokadu iha Grupu A hamutuk ho Filipina, Tazaskistaun no Maladewa no tuir oráriu sei hala’o jogu volta dahuluk kontra Filipina iha loron-09 Outubru no volta daruak iha loron-14 Outubru. Jogu datoluk sei kontra Tazaskistaun iha loron-18 Novembru no jogu ikus kontra Maladewa iha 31 Marsu 2026.
Entretantu, tuir tabela klasifikasaun, Timor-Leste okupa iha pozisaun datoluk ho pontu 3, rezultadu husi jogu rua (2), manán ida (1) no lakon ida (1) no sei iha oportunidade atu gaña pontu bainhira hasoru Filipina, Tazaskistaun no Maladewa.
Jornalista: Natalino Belo
Editór: Xisto Freitas da Piedade
