DILI, 25 Setembru (TATOLI)–Uniaun Bombeiru ba País ho Lian Portugés (UBPLP – União dos Bombeiros dos Países de Língua Portuguesa) entrega maskota, ne’ebé simboliza Prezidénsia Rotativa ba Timor-Leste, ne’ebé simu direta husi Primeiru-Ministru, Kay Rala Xanana Gusmão no indika atuál Diretór Nasionál Bombeiru, Anibal Paulo Maia asume Prezidente UBPLP.
Komandante Protesaun Sivíl no Servisu Bombeiru Angolanu, Bravo Pereira Mendes haktuir, UBPLP harii iha tinan 2007 husi inisiativa ida husi país ho Lian portugés no husi tinan ne’ebá to’o ohin loron, Prezidénsia rotativa tranzita ona ba nasaun membru sira.
Iha tinan kotuk, hala’o enkontru ida iha Angola, iha ámbitu Asembleia Jerál ba dala-hitu, ne’ebé fó dalan atu entrega Prezidénsia Rotativa ba Timor-Leste.
“Ami mai iha ne’e atu materializa saida maka falta, aktu ida entrega ofisiál ba ami-nia símbolu, ai-sanak, ne’ebé maka enkarna tranzisaun ida-ne’e, tuir enkontru kortezia nian, hodi aproveita ami-nia prezensa iha Timor-Leste. Knaar prinsipál mak aprezentasaun maskota,” Komndante Bombeiru informa ba Jornalista sira, iha Palásiu Governu, Kinta ne’e.
Notísia relevante : Bombeiru Bobonaru menus rekursu umanu no transporte operasionál
Bombeirus husi nasaun sira lian portugés halibur hamutuk, fahe koñesimentu, fahe esperiénsia, no forsa kooperasaun hodi kumpre ita-nia knaar no responsabilidade hotu, ne’ebé mak prezervasaun ba vida umana no bem públiku liuhusi salvamentu, kombate inséndiu, no atividade barak seluk tan.
Iha biban ne’e, Sekretáriu Estadu Autoridade Protesaun Sivíl, Domingos Mariano Reis informa, ohin vizita kortezia ida husi ekipa delegasaun Angola no Portugal, no iha ne’e Komandante Prinsipál Angolanu, ho Vise-Prezidente UBPLP ne’ebé maka estabele inisiativa iha tinan 2007.
“Iha tinan kotuk Angola asume kargu Prezidénsia Rotativa Bombeirus lian portugués nian no tinan ida-ne’e Angola entrega mai Timor-Leste hodi asume responsabilidade nu’udar Prezidente Rotativa UBPLP ba Komanndante Paul Anibal,” Sekretáriu Estadu hato’o.
Aleinde ne’e, Governu Portugal liuhusi UBPLP entrega simbólikamente ba Primeiru-Ministru Xanana.
“Atividade ba país ho lian portugés sira mak hanesan kapasitasaun ba rekursu umanu, téknikamente salvamentu sira nomós hodi responde ba dezastre sira,” nia katak.
Jornalista : Alexandra da Costa
Editora : Julia Chatarina
