DIL, 11 Jullu 2026 (TATOLI) – Ekipa mane basketeból Savarika hatudu nia dominasaun iha jogu hafoin manán DIT ho pontuasaun boot 45-16, enkuantu iha ekipa feto AD SLB alkansa vitória hasoru Savarika feto ho rezultadu 41-33 iha Liga Nasionál Basketeból ne’ebé realiza iha Jináziu Dili, ohin.
Iha jogu ekipa mane, husi minutu dahuluk Savarika kontrola jogu ho atake lalais no halo defeza ne’ebé metin, halo DIT susar atu dezenvolve sira-nia estratéjia.
Savarika loke diferensa boot iha kuarter daruak no datoluk, bainhira sira marka pontu beibeik no limita DIT nia movimentu ofensivu.
To’o apitu finál, Savarika hakotu jogu ho vitória 45-16, ne’ebé prova sira-nia kualidade iha kompetisaun ne’e.
Maski hetan derrota, DIT sei iha oportunidade atu hadi’a sira-nia performe iha jogu sira tuirmai hodi kontra ekipa seluk.
Iha kategoria feto, AD SLB manán jogu hasoru Savarika feto ho pontuasaun 41-33, hafoin domina kuarter daruak no mantein ritmu to’o jogu remata.
Iha kuarter daruak, AD SLB halakon Savarika ho pontuasaun 23-15, ne’ebé sai pontu importante ba vitória finál.
Savarika hetan oportunidade barak husi free throw tanba foult ne’ebé hetan, maibé la konsege ezekuta ho di’ak. Persentajen free throw tun maka’as, no turnover ka pasa sala bola barak estraga sira-nia oportunidade atu redús diferensa.
Iha sorin seluk, AD SLB joga ho kalma no organizadu. Sira aproveita fast break no second chance points husi rebound ofensivu no uza defeza zona atu limita Savarika nia movimentu tama bá área liña defeza SLB nian.
Tama ba kuarter datoluk no dahaat, AD SLB kontinua kontrola lala’ok jogu. Maski hetan aproveita foult barak no sempre la kona alvu ho di’ak, sira-nia defeza nafatin forte.
Savarika tenta fó resposta ho ritmu maka’as. Ekipa ne’e mós konsege lansa 3 point shot ida husi liña li’ur, ne’ebé ajuda hasa’e sira-nia pontu.
Maibé, AD SLB kontinua responde ho di’ak, limita tentativa sira husi liña tolu no mantein vantajen to’o remata jogu.
Ho rezultadu ne’e, AD SLB hatudu katak ho aproveita oportunidade no defeza maka’as importante liu duké shoot barak. Savarika presiza hadi’a sira-nia free throw no hadi’a desizaun bainhira hetan foult.
Notísia relevante: Ekipa feto no mane Santo António Manatutu hetan vitória iha Liga Nasionál Basketeból
Jornalista: Hortêncio Sanchez
Editora: Maria Auxiliadora
