OEKUSI, 26 Setembru 2025 (TATOLI) – Xefe Estadu Maiór Jenerál Forsa Armada, Tenente Jenerál Domingos Raul ‘Falur Rate Laek’, sesta ne’e, hasoru malu ho Autoridade Administrativa Espesiál Oekusi Ambenu (RAEOA) hodi diskute kona-ba kooperasaun servisu no husu atu tau matan ba Falintil- Forsa Defeza Timor-Leste (F-FDTL) ne’ebé destaka iha área referida.
“Ohin ami enkontru, ami troka impresaun no informasaun liuliu kooperasaun, depois ha’u husu Autoridade RAEOA sira-nia apoia atu dezenvolve ita-nia Forsa sira iha Oekusi, atu koopera ba seguransa, tanba ohin loron ne’e, serbisu hot-hotu, ne’ebé ita integradu no inkluzivu, tanba filozofia husi forsa, povu mak bee no forsa mak ikan, entaun ne’e presiza muda nia mentalidade – eduka ema, treina espirituál no profisionál fizikamente, nune’e bele hala’o filozofia ne’e di’ak,” Falur hateten ba jornalista sira hafoin remata reuniaun ho Autoridade RAEOA.
Sorumutu ofisiál ne’e, Líder másimu F-FDTL ne’e parabeniza povu Oekusi ne’ebé koopera di’ak tebes ho estrutura foun RAEOA nian hodi serbisu hamutuk no tempu ona atu halo mudansa jerasionál ba jerasaun foun sira.
Iha fatin hanesan, Prezidente Autoridade RAEOA, Régio da Cruz Salu, agradese Xefe Estadu Maiór Jenerál Forsa Armada, Tenente Jenerál Domingos Raul ‘Falur Rate Laek’ tanba bele vizita ona Autoridade RAEOA hodi ko’alia no reforsa-tan lala’ok administrasaun iha Oekusi.
“Ne’e onra tebes ba povu Oekusi, hanesan uluk ita hateten katak, ita-nia semana abertura orientasaun serbisu, sei kontinua akompaña, ida-ne’e faz parte iha akompañamentu orientasaun serbisu, ha’u-nia serbisu kona-ba karateriza saida mak orientasaun serbisu, ita sei atravesa liuhusi serbisu institusionál, estruturál no funsionál,” nia hateten.
Notísia relevante:Tenente Jenerál Falur komprometidu kontinua fortifika formasaun ba F-FDTL
Entretantu, tuir ajenda ne’ebé TATOLI asesu, hafoin enkontru ho Autoridade RAEOA, Xefe Estadu Maiór Jenerál Forsa Armada, Tenente Jenerál Domingos Raul ‘Falur Rate Laek’, kontinua viajén ba Sub-Rejiaun sira hodi observa situasaun iha fronteira no vizita ba postu F-FDTL ne’ebé destaka iha Oekusi hanesan komponente Terrestre iha Sikone Suku Lalisuk no komponente Navál iha bairru Oébu Suku Costa.
Tuir planu, iha loron sábadu, 27 Setembru 2025, sei kontinua dezloka ba Sub-Rejiaun Nítibe atu observa situasaun sira iha área fronteira.
Jornalista: Abílio Elo Nini
Editór: Rafael Ximenes de A. Belo
