Governu despede bolseiru bolsa méritu na’in-146
DILI, 26 Setembru 2025—Governu liuhusi Ministériu Planeamentu no Investimentu Estratéjiku (MPIE) no Fundu Dezenvolvimentu Kapitál Umanu (FDCH-sigla portugeza), Sesta ne’e, despede bolseiru ba bolsa méritu hamutuk 146 ne’ebé atu hala’o sira-nia estudu iha Indonézia, Malázia, Portugál no Brazíl.
“Bolseiru foinsa’e sira-ne’e nu’udár investimentu estratéjiku Governu nian iha dezenvolvimentu rekursu umanu hodi prepara joven sira atu reforsa dezenvolvimentu Timor-Leste iha setór importante oioin haktuir ba planu no prioridade nasionál iha futuru,” Diretór Ezekutivu FDCH, Júlio Aparício hateten iha serimónia despedida bolseiru iha salaun GMNTV, Kolmera, Dili.
Iha biban ne’e, Primeiru-Ministru (PM), Kay Rala Xanana Gusmão enkoraja bolseiru sira atu bá estuda aprende iha ema-nia rai no bainhira fila-hikas serbí Timor-Leste.
“Bolseiru sira atu nafatin estuda hodi buka esperiénsia atu lori fali mai hodi kontribui ba Timor-Leste,” Xanana apela.
Iha fatin hanesan, Bolseiru Joaozito Soares sente onradu no agradese ba parte hotu-hotu liuliu FDCH tanba bele hetan oportunidade atubele kompete no selesionadu ba bolsa referida.
“Ha’u sente onradu tanba bele hetan oportunidade atu kompete no ida-ne’e hanesan previléjiu ida mai ami. Maibé mós ho resposabilidade ida-ne’ebé boot tebes,” nia dehan.
Notísia relevante: FDCH sei haruka bolseiru 100-resin ba eskola iha rai-li’ur
Hosi bolseiru 146 ne’e, bolseiru ne’ebé estudu iha Indonézia hamutuk na’in-50, na’in-30 konsentradu estuda iha área aeroportu nian ho programa estudu diploma III. Bolseiru na’in-20 ba programa estudu lisensiatura no mestradu iha área estudu sira hanesan Ship Operations Engineering Technology, Port Management and Maritime Logistics, Etnomuzikolojia, Art Management, Arte Espetákulu, Belas-Arte, Business Travel Management, Medisina Veterinária, Medisina Jerál no Parteira.
Ba Malázia, bolseiru foun hamutuk 55 ho programa estudu lisensiatura no mestradu ne’ebé sei hala’o estudu iha área Software Development, Internacional Business and Management, Psychology, Multimedia Animation, Immersive Media Design, Biomedical Science, Nutrition, Mecatronics Engineering, Electrical Engineering Technology (Industrial Power), Artificial Inteligence, Water Engineering and Energy, Science with Honours in Industrial Chemistry, Oil and Gas Engineering no Civil Engineering.
Ba Portugál, bolseiru foun hamutuk na’in-hitu (7) ho programa estudu mestradu no doutoramentu ne’ebé sei hala’o estudu iha área Matemátika, lian Portugeza (Linguístika), Língua Portugeza naun Materna, Enfermajen no Medisina.
Ba Brazíl, bolseiru foun sira hamutuk na’in-34 ho porgrama estudu hahú husi lisensiatura, mestradu to’o doutoramentu. Bolseiru sira-ne’e husi dosente universidade no instituisaun ensinu superiór iha área Matemátika, Economia Aplicada (agro-economia), Fízika, Ciências Farmacêuticas (Farmácia), Ciências Biológicas (Microbiologia), Enjinária. Produsaun, Saúde no Nutrisaun, Edukasaun, Bioteknolojia no Enfermajen.
Entretantu, bolseiru bolsa méritu hala’o sira-nia estudu iha área sira hanesan Gestão de Agro-Negócio, Engenharia de Alimentos, Engenharia Agrícola e Ambiental, Engenharia de Agrimensura e Cartográfica, Cooperativismo-área agrícola, Ensino da Química no Ensino da Matemática.
Jornalista: Osória Marques
Editór: Xisto Freitas da Piedade
