DILI, 26 setembru 2025 (TATOLI) –Embaixada Indonézia iha Dili konvida timoroan hotu ne’ebé hela iha Dili atu tuir loron Indonézia 2025, ne’ebé sei hala’o sábadu, (27/09) iha Timor Plaza Dili hodi hametin fraternidade entre nasaun rua.
Tuir oráriu ne’ebé iha eventu referidu sei hala’o hahú tuku 15h30 to’o tuku 22h00 oras lokál.
Selebrasaun ne’e hala’o ho tema “Hametin Lasu Kulturál no Ekonómiku ho Timor-Leste ba Integrasaun ASEAN, Pás, no Armonia” hanesan momentu ida hodi hametin relasaun kulturál no ekonómika entre Indonézia ho Timor-Leste no apoia Timor-Leste nia adezaun tomak ba ASEAN iha fulan-Outubru mai ne’e.
Eventu ne’e sei loke ofisialmente husi Embaixadór Indonézia iha Timor-Leste, Okto Dorinus Manik, hamutuk ho Prezidente Repúblika José Ramos-Horta no Primeiru-Ministru Kay Rala Xanana Gusmão.
Embaixadór Indonézia Okto Dorinus Manik hateten liuhusi konferénsia imprensa ne’ebé hala’o iha Embaixada Indonézia Farol Dili sesta ne’e katak, eventu ne’e selebra ho objetivu prinsipál tolu.
“Primeiru, atu komemora Aniversáriu Proklamasaun Independénsia Indonézia ba dala-80. Daruak, hametin amizade entre Indonézia ho Timor-Leste. Terseiru, fó divertimentu no hametin turizmu iha Timor-Leste,” Diplomata Indonéziu ne’e esplika.
Notísia relevante:KBRI organiza resepsaun diplomátika iha ámbitu selebrasaun loron proklamasaun ba dala-79
Nia akresenta tan katak, série eventu sira sei hatudu atuasaun arte nian, múzika, no kolaborasaun sira hosi artista nasaun rua ne’e nian.
Notavelmente, múziku koñesidu sira hanesan Jacson Seran no Fresly Nikijuluw husi Indonézia no Jessie Lopez husi Timor-Leste sei enfeita palku hanesan símbolu amizade nian.
Aleinde ne’e, stand kulinária, moda, no produtu kreativu sanulu-resin mós sei marka prezensa, inklui kontribuisaun husi empreza estatál Indonézia nian ne’ebé hala’o operasaun iha Timor-Leste iha merkadu kalan nian.
Oportunidade manan prémiu
Embaixadór Okto mós subliña, públiku sei iha oportunidade atu manán prémiu door prize oioin, hahú husi billete aviaun no aparellu eletróniku sira to’o prémiu atrativu sira seluk.
“Ida-ne’e hanesan selebrasaun ida hamutuk nian. Ami konvida rezidente Timor-Leste tomak, liuliu iha Dili no zona sira ne’ebé hale’u, hodi mai hamutuk. Mai ita mantein espíritu maun-alin nian, parentesku, no kooperasaun entre nasaun sira,” nia hateten.
Loron Indonézia 2025 loke ba públiku no gratuita. Komité ne’e kalkula katak vizitante rihun ba rihun, inklui sira ne’ebé mai husi komunidade internasionál iha Dili, sei marka prezensa iha eventu ne’e.
Notísia relevante:KBRI Dili komemora loron independénsia Indonézia ba dala 76
Jornalista: Hortencio Sanchez
Editór: Rafael Ximenes de A. Belo
